Otandyq aýylsharýashylyq tehnıkasyn óndirýshi «AGROMASH» zaýyty shyǵyndy óz moınyna alyp, qazaqstandyq fermerlerdi qoldaý maqsatynda baǵany tómendetýge sheshim qabyldady. Kompanıa bylaı dep túıindedi: «Biz bir elde turamyz jáne jumys isteımiz, eger biz óndirýshiler osyndaı qıyn ýaqytta kómek kórsetpesek kim kómektesedi».
Aýyl sharýashylyǵyndaǵy ótken qıyn maýsym men bıylǵy sý tasqynynyń saldary egis naýqany qarsańynda aýyl sharýashylyǵy taýaryn óndirýshilerdiń jaǵdaıyn qıyndatyp otyr. Óndirýshiler atap ótkendeı, olardyń aldynda turǵan mańyzdy mindet – Qazaqstanda jasalǵan senimdi jáne qoljetimdi tehnıkany usyný arqyly fermerlerge sońǵy jyldardaǵy qıyndyqtardy jeńýge kómektesý.
– Búgingi tańda kóptegen sharýashylyqtar sý tasqyny saldarynan qıyn jaǵdaıǵa tap bolǵan qazaqstandyq fermerlerge barynsha kómektesý mańyzdy ekenin túsinemiz. Tabıǵat apatynan góri halyqtyń birligi áldeqaıda kúshti. Biz otandyq óndirýshi retinde shette qala almaımyz, sondyqtan kompanıanyń seriktes brend ıeleri «Gomselmash» AAQ jáne «Weichai Lovol Intelligent Agricultural Technology Co., Ltd» birge shyǵyndardyń bir bóligin alyp, tehnıka baǵasyn tómendetý týraly sheshim qabyldady. Sonymen qatar, osy sheshimge baılanysty bizdiń zaýyt bıyl ınvestısıalyq shyǵyndardy qysqartyp otyr, – dedi komersıalyq dırektor Nıkolaı Parhomenko.
«QazAgroQarjy» kompanıasynyń qoldaýymen fermerler úshin qıyn kezeńde zaýyt ESSIL jáne LOVOL kombaındarynyń baǵasyn 15%-ǵa tómendetedi.
Baǵdarlama 19 sáýirde bastalady. Barlyq suraqtar boıynsha Qazaqstannyń aýylsharýashylyq taýar óndirýshileri óz aımaqtaryndaǵy AGROMASH zaýytynyń fılıaldary men «QazAgroQarjy» kompanıasyna habarlasa alady.
