Astana ákimdigi qyzmetkerlerge arnalǵan avtokólik jaldaý shyǵyndaryna biýdjetten qosymsha 1,8 mlrd teńge bóldi. Bul qarajat birneshe jylǵa eseptelgen qyzmettik kólikpen qamtamasyz etý jobasyn jalǵastyrý úshin qajet, dep habarlaidy dalanews.kz.
BES.media málimetinshe, qosymsha qarjy bólý týraly Astana qalasynyń Investitsiialar jáne kásipkerlikti damytý basqarmasy basshysynyń orynbasary Maqsat Janabaev habarlaǵan.
2024 jyly ákimdik Ecology Service kompaniiasymen avtokólik pen taksi qyzmetterin jalǵa alý boiynsha memlekettik-jekemenshik áriptestik kelisimshartyn jasaǵan. Kelisimniń jalpy quny 5,6 mlrd teńge, al onyń merzimi 7 jylǵa eseptelgen.
Maqsat Janabaevtyń aitýynsha, jobany úzdiksiz júzege asyrý úshin aldaǵy bes jylǵa qosymsha 1,8 mlrd teńge qajet. Ol qosymsha qarjylandyrý qajettiligin júrgizýshilerdiń eńbekaqy qorynyń ósýimen, QQS mólsherlemesiniń kóterilýine bailanysty salyq júktemesiniń artýymen, sondai-aq avtoparkti kútip ustaý men paidalanýǵa ketetin shyǵyndardyń 15–20%-ǵa qymbattaýymen túsindirdi.
Ákimdik Ecology Service kompaniiasynan qosymsha kólikter alýdy da josparlap otyr. Sonyń ishinde bir kólik Balalardyń quqyqtaryn qorǵaý jónindegi jańa basqarmaǵa qajet ekeni aityldy.
Sonymen qatar vedomstvoǵa miniven qajet. Bul qajettilik kóshpeli is-sharalar sanynyń artýymen bailanysty ekeni atap ótildi.
Maqsat Janabaevtyń sózinshe, bólingen qarajattyń bir bóligi salyq túsimderi túrinde biýdjetke qaita oralady. Áńgime shamamen 1,6 mlrd teńge týraly bolyp otyr.
Ákimdikte Ecology Service qyzmetteriniń baǵasy basqa avtopark usynystarymen salystyrylǵany jáne qoldanystaǵy kelisimshartta tarifterdiń tómen ekeni aityldy.
Málimetke sáikes, qoldanystaǵy kelisim boiynsha elektromobildi jaldaý quny táýligine 43 myń teńge, al basqa avtoparkte dál osyndai qyzmet 73 myń teńgege baǵalanǵan.
Al biznes-klass kóligin jaldaý quny Ecology Service-pen jasalǵan kelisim boiynsha táýligine 56 myń teńge bolsa, basqa jetkizýshide bul kórsetkish 61 myń teńge.
