Esterińizde bolsa óńir basshysy ótken jyly Saryaǵash aýdanyndaǵy «Agro Fýd Qazaqstan» JShS-niń intensivti baýynyń alǵashqy kóshetin óz qolymen otyrǵyzyp, jańa jobany bastap bergen bolatyn.
Minekei, byltyr ǵana jumysyn bastaǵan baq búginde keńeiip, 250 gektar aýmaqty qamtyp otyr. Biylǵy jyly intensivti baýda 22 gektarǵa shie, 13 gektarǵa órik, 70 gektarǵa shabdaly jáne 92 gektarǵa alma kóshetteri egilgen eken. Bul óńirdegi iri jobalardyń biri. Aita keterligi, biylǵy jyly 70 gektar aýmaqqa shabdaly oblysta alǵash ret egildi. Bul da oblys basshysynyń tapsyrmasy aiasynda júzege asqan jarqyn jobalardyń biri.
«Baýdan aldaǵy ýaqytta 60 tonna alma ónimin alý josparlanyp otyr eken. Oblystaǵy ortasha kórsetkish 15 tonna ekenin eskersek, mundai ónim Túrkistan óńirinde buryn-sońdy bolmaǵan. Osyndai ozyq tájiribelerdi ózge aýdandarda da paidalanyp, intensivti baýlar sanyn arttyrýymyz qajet», - degen edi sol jolǵy saparynda oblys basshysy.
Saryaǵashta budan ózge de kózge kórinetin ózgerister bolyp jatyr. Aitalyq, ótken jyly Derbisek, Jibek joly, Jemisti, Qyzyljar, Aqjar syndy birqatar aýyldardyń joly kúrdeli jóndeýden ótti. Sondai-aq, atalǵan eldi mekenderge qosymsha jaiaý júrginshiler joly salyndy. Aýdandaǵy 8 aýyl tabiǵi gazben qamtamasyz etilip, 2700 úige kógildir otyn bardy. Sonymen qatar, aldaǵy ýaqytta 13 aýylǵa gaz tartylyp, 10 aýyl táýlik boiy taza aýyz sýmen qamtylatyn bolady.
