Almatydaǵy Ál-Farabi dańǵylynda úsh adamnyń ómirin qiǵan jol apatyna qatysty advokat Djohar Ótebekov quqyqtyq saldar jóninde pikir bildirdi, dep habarlaidy dalanews.kz.
Onyń aitýynsha, mundai isterde jábirlenýshi tarap keshirgen kúnniń ózinde, taraptardyń tatýlasýy arqyly qylmystyq isti toqtatý múmkin emes. Sebebi adam ólimine ákelgen jol-kólik oqiǵalary aýyr qylmys sanatyna jatady.
Advokat shartty jaza máselesine de toqtaldy. Onyń sózinshe, zań boiynsha mundai isterde shartty jaza berýge tikelei tyiym joq. Alaida sot tájiribesinde mundai sheshimder óte sirek qabyldanady.
Ótebekovtiń aitýynsha, atalǵan bap boiynsha kúdiktige 7 jyldan 10 jylǵa deiin bas bostandyǵynan aiyrý jazasy qarastyrylǵan. Biraq tájiribede sottar kóbine keltirilgen shyǵyn ótelse jáne aýyrlatatyn jaǵdailar bolmasa, 5 jyl shamasynda jaza taǵaiyndaidy.
Sondai-aq ol sottalǵan adam jazasyn koloniia-qonysta óteýi múmkin ekenin aitty. Advokattyń sózinshe, bul — qatań rejimdegi mekemelermen salystyrǵanda jeńilirek jaǵdaidaǵy túzeý mekemesi.
Budan bólek, advokat tergeý izoliatorynda ótkizilgen ýaqyttyń da esepteletinin atap ótti.
«Bir kún tergeý izoliatorynda otyrý koloniia-qonystaǵy eki kúnge teńestiriledi», – dedi ol.
Ótebekov sondai-aq shartty túrde merziminen buryn bosaý múmkindigi bar ekenin aitty. Onyń sózinshe, eger sottalǵan adam jeńildetilgen tártipke ilinse, jaza merziminiń tórtten birin ótegennen keiin, shamamen 1 jyl 3 aidan soń bostandyqqa shyǵýy múmkin.
