Májilis depýtaty Ashat Aimaǵambetov «AMANAT» pen «Ádilet» partiialarynyń birigýine qatysty pikir bildirip, mundai sheshimniń negizinde eki saiasi kúshtiń ortaq qundylyqtary men uqsas ustanymdary jatqanyn aitty, dep habarlaidy dalanews.kz.
Onyń sózinshe, eki partiianyń kózqarastary, maqsat-múddeleri men saiasi baǵyttary bir-birine jaqyn.
«Jalpy bizdiń kózqarastarymyz birdei. Qundylyqtarymyz ortaq, maqsat-múddemiz de bir. Osy ýaqytqa deiin kótergen bastamalarymyz, zań jobalary, qoǵamdaǵy ózekti máseleler boiynsha aitqan pikirlerimiz de uqsas boldy. Eger Qazaqstandaǵy eki partiianyń maqsat-múddesi bir bolsa, qundylyqtary bir bolsa, kózqarastary bir bolsa, ekeýi de Ádiletti Qazaqstandy qoldasa, ekeýi de prezidenttiń saiasatyn qoldaityn bolsa, onda nege olar bólek partiia retinde jumys istei berýi kerek? Sondyqtan olardyń kúshterin biriktirip, bir platforma aiasynda jumys isteýi logikalyq ári túsinikti sheshim dep oilaimyn», – dedi Aimaǵambetov.
Depýtattyń aitýynsha, eki partiia da tsentristik baǵytty ustanady jáne eldegi reformalardy qoldaý máselesinde uqsas ustanymǵa ie. Osyǵan bailanysty olardyń bir saiasi qurylym aiasynda jumys isteýi tabiǵi qadam bolyp sanalady.
