Мәжіліс депутаты Асхат Аймағамбетов «AMANAT» пен «Әділет» партияларының бірігуіне қатысты пікір білдіріп, мұндай шешімнің негізінде екі саяси күштің ортақ құндылықтары мен ұқсас ұстанымдары жатқанын айтты, деп хабарлайды dalanews.kz.
Оның сөзінше, екі партияның көзқарастары, мақсат-мүдделері мен саяси бағыттары бір-біріне жақын.
«Жалпы біздің көзқарастарымыз бірдей. Құндылықтарымыз ортақ, мақсат-мүддеміз де бір. Осы уақытқа дейін көтерген бастамаларымыз, заң жобалары, қоғамдағы өзекті мәселелер бойынша айтқан пікірлеріміз де ұқсас болды. Егер Қазақстандағы екі партияның мақсат-мүддесі бір болса, құндылықтары бір болса, көзқарастары бір болса, екеуі де Әділетті Қазақстанды қолдаса, екеуі де президенттің саясатын қолдайтын болса, онда неге олар бөлек партия ретінде жұмыс істей беруі керек? Сондықтан олардың күштерін біріктіріп, бір платформа аясында жұмыс істеуі логикалық әрі түсінікті шешім деп ойлаймын», – деді Аймағамбетов.
Депутаттың айтуынша, екі партия да центристік бағытты ұстанады және елдегі реформаларды қолдау мәселесінде ұқсас ұстанымға ие. Осыған байланысты олардың бір саяси құрылым аясында жұмыс істеуі табиғи қадам болып саналады.
