Ábliazovtyń orynbasary Jarymbetov: «Men jaldamaly menedjermin, túsinesizder ǵoi»
– 17 kúni meni Túrkiianyń shegarashylary jalǵan tólqujatpen ustady. Politsiiada otyryp bárin oi eleginen ótkizdim de, eldegi Qazaqstannyń bas konsýldyǵyna habarlasýdy suradym. Interpol tiziminde bolǵandyqtan 20 kúni men Qazaqstanǵa qaitardy. 21 kúni Astanada UQK tergeý abaqtysyna qamaldym. Birden aitaiyn, eshkim meni azaptaǵan joq. Kei quqyq qorǵaý uiymdary maǵan qaýip tónip tur dep oilady, olai emes bári jaqsy. Munda eshqandai saiasat joq. Men bankten aqsha jymqyrdy dep kúdikke ilindim. Bul iste sońǵy núkteni sot qoiady. Sot qandai úkim shyǵarsa da, qabyl alamyn. Budan Ábliazov siiaqtylar bir paida kórgisi kelip, jýrnalisterge basqasha aqparat berip, bul jaǵdaidy saiasilandyrǵysy keledi. Bul qajetsiz dep bilemin, – dedi Jarymbetov BAQ ókilderimen ótkizgen brifing barysynda.
Onyń aitýynsha, ol 8 jyl qashyp júrgen. «Kóp ýaqyt Angliiada boldym, ol jerde saiasi statýsym bar. Keiin Eýropada biraz ýaqyt, Túrkiiada. Turmys tirshiligime Ábliazovtyń adamdary, ózi de kómektesti. Jiǵan-tergenim de bolatyn. 1989 jyldan beri biznestemin ǵoi qaitkenimen. Bankke jumysqa kirgenge deiin de turmysym jaqsy bolatyn», – deidi Jarymbetov.
Jarymbetovtyń sózinshe, qazirgi kezde ol kitap jazyp jatyr.
– Aýyr júkten arylǵandaimyn. Basynda-aq osylai isteý kerek edi, biraq, túrli jaǵdailar boldy. Men protsessýaldyq normany moiyndaimyn, men ol iske qatysty bolǵanym úshin kinálimin, biraq jaǵdai basqasha boldy. Árine, men qoryqtym. Eshkim eshteńe anyqtamai, bárin túrmege jabatyndai elestedi. Óziń úshin emes, otbasym qoldaýsyz, kómeksiz qalady dep. Men qorqaq emespin, – dedi ol.
«Ár istiń sońy bolady. Men tergeýge kómektesip jatyrmyn, jaýaby tabylmaǵan máselelerdi anyqtap bergim keledi. Oń nátijesi bolady degen úmittemin. Bul maǵan da, men shetelde qashyp júrgende sottalyp ketken jáne áli de qashyp júrgen adamdarǵa da paidaly», – dedi Jarymbetov.
– Men kompaniiaǵa jumys istedim, jaldamaly menedjermin, túsinesizder. Bank basshylyǵy men aktsionerleri mindet qoiady. Árine, biz ulttyq banktiń protsessýaldyq normalary men ózge de zańdardy buzdyq. Mundaiǵa sanaly túrde bardyq. Qazaqstanda biznes júrgizýdiń qalypty kórinisi dep oiladyq. Barlyǵy osylai isteidi degen oida edik. Urlyq bolǵan joq, men eshkimniń qaltasyna túsken joqpyn. Endi eshqaida qashpaimyn, sharshadym. Ózge elde qýǵynda júrgim kelmeidi. Úsh kúnde adam tozaqqa da úirenedi deidi ǵoi. Bárine de shydaýǵa bolady, – dep aiaqtady sózin burynǵy bankir.
Sonymen birge, Jarymbetov 2012 jyldan beri Muhtar Ábliazovpen esh habarlaspaǵanyn aitady. Advokattyń sózinshe, memleketke esh shyǵyn kelmedi, bankke ǵana ziian tigen.
2009 jyldyń 2 naýryzynda Bas prokýratýra Muhtar Ábliazov, banktiń basqarma tóraǵasynyń birinshi orynbasary Jaqsylyq Jarymbetov pen sybailastaryna qatysty qylmystyq is qozǵaǵan bolatyn. Kúdiktilerge halyqaralyq izdeý salynǵan edi.
