– 17 كۇنى مەنى تۇركيانىڭ شەگاراشىلارى جالعان تولقۇجاتپەن ۇستادى. پوليسيادا وتىرىپ ءبارىن وي ەلەگىنەن وتكىزدىم دە، ەلدەگى قازاقستاننىڭ باس كونسۋلدىعىنا حابارلاسۋدى سۇرادىم. ينتەرپول تىزىمىندە بولعاندىقتان 20 كۇنى مەن قازاقستانعا قايتاردى. 21 كۇنى استانادا ۇقك تەرگەۋ اباقتىسىنا قامالدىم. بىردەن ايتايىن، ەشكىم مەنى ازاپتاعان جوق. كەي قۇقىق قورعاۋ ۇيىمدارى ماعان ءقاۋىپ ءتونىپ تۇر دەپ ويلادى، ولاي ەمەس ءبارى جاقسى. مۇندا ەشقانداي ساياسات جوق. مەن بانكتەن اقشا جىمقىردى دەپ كۇدىككە ءىلىندىم. بۇل ىستە سوڭعى نۇكتەنى سوت قويادى. سوت قانداي ۇكىم شىعارسا دا، قابىل الامىن. بۇدان ءابليازوۆ سياقتىلار ءبىر پايدا كورگىسى كەلىپ، جۋرناليستەرگە باسقاشا اقپارات بەرىپ، بۇل جاعدايدى ساياسيلاندىرعىسى كەلەدى. بۇل قاجەتسىز دەپ بىلەمىن، – دەدى جارىمبەتوۆ ب ا ق وكىلدەرىمەن وتكىزگەن بريفينگ بارىسىندا.
ونىڭ ايتۋىنشا، ول 8 جىل قاشىپ جۇرگەن. «كوپ ۋاقىت انگليادا بولدىم، ول جەردە ساياسي ستاتۋسىم بار. كەيىن ەۋروپادا ءبىراز ۋاقىت، تۇركيادا. تۇرمىس تىرشىلىگىمە ءابليازوۆتىڭ ادامدارى، ءوزى دە كومەكتەستى. جيعان-تەرگەنىم دە بولاتىن. 1989 جىلدان بەرى بيزنەستەمىن عوي قايتكەنىمەن. بانككە جۇمىسقا كىرگەنگە دەيىن دە تۇرمىسىم جاقسى بولاتىن»، – دەيدى جارىمبەتوۆ.
جارىمبەتوۆتىڭ سوزىنشە، قازىرگى كەزدە ول كىتاپ جازىپ جاتىر.
– اۋىر جۇكتەن ارىلعاندايمىن. باسىندا-اق وسىلاي ىستەۋ كەرەك ەدى، ءبىراق، ءتۇرلى جاعدايلار بولدى. مەن پروسەسسۋالدىق نورمانى مويىندايمىن، مەن ول ىسكە قاتىستى بولعانىم ءۇشىن كىنالىمىن، ءبىراق جاعداي باسقاشا بولدى. ارينە، مەن قورىقتىم. ەشكىم ەشتەڭە انىقتاماي، ءبارىن تۇرمەگە جاباتىنداي ەلەستەدى. ءوزىڭ ءۇشىن ەمەس، وتباسىم قولداۋسىز، كومەكسىز قالادى دەپ. مەن قورقاق ەمەسپىن، – دەدى ول.
«ءار ءىستىڭ سوڭى بولادى. مەن تەرگەۋگە كومەكتەسىپ جاتىرمىن، جاۋابى تابىلماعان ماسەلەلەردى انىقتاپ بەرگىم كەلەدى. وڭ ناتيجەسى بولادى دەگەن ۇمىتتەمىن. بۇل ماعان دا، مەن شەتەلدە قاشىپ جۇرگەندە سوتتالىپ كەتكەن جانە ءالى دە قاشىپ جۇرگەن ادامدارعا دا پايدالى»، – دەدى جارىمبەتوۆ.
– مەن كومپانياعا جۇمىس ىستەدىم، جالدامالى مەنەدجەرمىن، تۇسىنەسىزدەر. بانك باسشىلىعى مەن اكسيونەرلەرى مىندەت قويادى. ارينە، ءبىز ۇلتتىق بانكتىڭ پروسەسسۋالدىق نورمالارى مەن وزگە دە زاڭداردى بۇزدىق. مۇندايعا سانالى تۇردە باردىق. قازاقستاندا بيزنەس جۇرگىزۋدىڭ قالىپتى كورىنىسى دەپ ويلادىق. بارلىعى وسىلاي ىستەيدى دەگەن ويدا ەدىك. ۇرلىق بولعان جوق، مەن ەشكىمنىڭ قالتاسىنا تۇسكەن جوقپىن. ەندى ەشقايدا قاشپايمىن، شارشادىم. وزگە ەلدە قۋعىندا جۇرگىم كەلمەيدى. ءۇش كۇندە ادام توزاققا دا ۇيرەنەدى دەيدى عوي. بارىنە دە شىداۋعا بولادى، – دەپ اياقتادى ءسوزىن بۇرىنعى بانكير.
سونىمەن بىرگە، جارىمبەتوۆ 2012 جىلدان بەرى مۇحتار ابليازوۆپەن ەش حابارلاسپاعانىن ايتادى. ادۆوكاتتىڭ سوزىنشە، مەملەكەتكە ەش شىعىن كەلمەدى، بانككە عانا زيان تيگەن.
2009 جىلدىڭ 2 ناۋرىزىندا باس پروكۋراتۋرا مۇحتار ءابليازوۆ، بانكتىڭ باسقارما ءتوراعاسىنىڭ ءبىرىنشى ورىنباسارى جاقسىلىق جارىمبەتوۆ پەن سىبايلاستارىنا قاتىستى قىلمىستىق ءىس قوزعاعان بولاتىن. كۇدىكتىلەرگە حالىقارالىق ىزدەۋ سالىنعان ەدى.
