Astanada «JOLTAP» jobasy júzege asyp jatyr. Joba jumyssyz azamattarǵa jumys tabýǵa jáne qarjylyq jaǵdaiyn jaqsartýǵa múmkindik beredi. Búgingi tańda joba aiasynda 2 myńnan astam astanalyq túrli mamandyq boiynsha oqytý kýrstarynan ótti, – dep habarlaidy Dalanews.kz elorda ákimdiginiń resmi saityna silteme jasap.
Elordanyń 32 jastaǵy turǵyny Ábilmansur Baianhan «JOLTAP» jobasyna deiin ózin túrli salada synap kórgen. 7 aidan astam ýaqyt konditer aspazshysy bolyp jumys istepti, endi 3 aidan beri barista bolyp júr.
– Men «Baǵdarlamashy» mamandyǵy boiynsha bilim aldym. Alaida, jihaz salasynda 8 jyldan astam jumys istedim. Ótken jyly men tamaqtaný salasyna aýysqym keldi jáne konditerlik boiynsha jumys taptym. 7 ai konditer bolyp jumys istegennen keiin konditerlik kofehana ashqym keldi», – deidi astanalyq.
Ol «JOLTAP» jobasy týraly bilip, barista mamandyǵy boiynsha oqý týraly sheshim qabyldaǵan.
– Men joba týraly kútpegen jerden bildim. Qala kóshelerinde «Barshaǵa múmkindik» modýldik pýnkteri men konsýltatsiialyq ortalyqtardy kórdim. Sodan baǵdarlama týraly, onyń múmkindikteri týraly bilip, jańa mamandyqty igerý týraly sheshim qabyldadym. Usynylǵan 14 kásiptiń ishinen «Barista» baǵytyn tańdap, óz maqsatyma jol ashtym, – deidi suhbattasýshy.
Bir aptanyń ishinde ol kásibi barista daǵdylaryn igerip, jumysqa kirisip ketti.
– Barista mamandyǵy óte qyzyqty jáne ózekti. Oqýdy aiaqtaǵannan keiin jumys izdep, qabyldaýlarǵa bara bastadym. Birneshe kofehanaǵa júgindim jáne tórtinshi kúni ekeýinen jaýap keldi. Qazir men úsh aidan beri barista bolyp jumys istep, tabys taýyp júrmin, – dedi Ábilmansur Baianhan.
Aitýynsha «JOLTAP» qala turǵyndary úshin óte qajet joba. Ol astanalyqtarǵa mamandyǵyn aýystyryp qana qoimai, súiikti isimen de ainalysýǵa múmkindik beredi.
– Kóptegen adam baǵdarlama týraly keńinen bile alady, ózderi úshin qyzyqty salany tańdai alady jáne bolashaqta tipti óz isin asha alady. Joba elordanyń árbir turǵyny úshin qoljetimdi múmkindikter beredi, – dedi ol.
Joba aiasynda yńǵaily oqytý úshin qajetti barlyq zattarmen jabdyqtalǵan jekelegen oqý synyptarynda júrgiziledi. Ótý merzimi – úsh kúnnen bir aiǵa deiin.
Bul jobaǵa 18-50 jas aralyǵyndaǵy astanalyqtar qatysa alady. Sońynda túlekterge sertifikattar beriledi.
