استانادا «JOLTAP» جوباسى جۇزەگە اسىپ جاتىر. جوبا جۇمىسسىز ازاماتتارعا جۇمىس تابۋعا جانە قارجىلىق جاعدايىن جاقسارتۋعا مۇمكىندىك بەرەدى. بۇگىنگى تاڭدا جوبا اياسىندا 2 مىڭنان استام استانالىق ءتۇرلى ماماندىق بويىنشا وقىتۋ كۋرستارىنان ءوتتى، – دەپ حابارلايدى Dalanews.kz ەلوردا اكىمدىگىنىڭ رەسمي سايتىنا سىلتەمە جاساپ.
ەلوردانىڭ 32 جاستاعى تۇرعىنى ءابىلمانسۇر بايانحان «JOLTAP» جوباسىنا دەيىن ءوزىن ءتۇرلى سالادا سىناپ كورگەن. 7 ايدان استام ۋاقىت كونديتەر اسپازشىسى بولىپ جۇمىس ىستەپتى، ەندى 3 ايدان بەرى باريستا بولىپ ءجۇر.
– مەن «باعدارلاماشى» ماماندىعى بويىنشا ءبىلىم الدىم. الايدا، جيھاز سالاسىندا 8 جىلدان استام جۇمىس ىستەدىم. وتكەن جىلى مەن تاماقتانۋ سالاسىنا اۋىسقىم كەلدى جانە كونديتەرلىك بويىنشا جۇمىس تاپتىم. 7 اي كونديتەر بولىپ جۇمىس ىستەگەننەن كەيىن كونديتەرلىك كوفەحانا اشقىم كەلدى»، – دەيدى استانالىق.
ول «JOLTAP» جوباسى تۋرالى ءبىلىپ، باريستا ماماندىعى بويىنشا وقۋ تۋرالى شەشىم قابىلداعان.
– مەن جوبا تۋرالى كۇتپەگەن جەردەن ءبىلدىم. قالا كوشەلەرىندە «بارشاعا مۇمكىندىك» مودۋلدىك پۋنكتەرى مەن كونسۋلتاسيالىق ورتالىقتاردى كوردىم. سودان باعدارلاما تۋرالى، ونىڭ مۇمكىندىكتەرى تۋرالى ءبىلىپ، جاڭا ماماندىقتى يگەرۋ تۋرالى شەشىم قابىلدادىم. ۇسىنىلعان 14 كاسىپتىڭ ىشىنەن «باريستا» باعىتىن تاڭداپ، ءوز ماقساتىما جول اشتىم، – دەيدى سۇحباتتاسۋشى.
ءبىر اپتانىڭ ىشىندە ول كاسىبي باريستا داعدىلارىن يگەرىپ، جۇمىسقا كىرىسىپ كەتتى.
– باريستا ماماندىعى وتە قىزىقتى جانە وزەكتى. وقۋدى اياقتاعاننان كەيىن جۇمىس ىزدەپ، قابىلداۋلارعا بارا باستادىم. بىرنەشە كوفەحاناعا جۇگىندىم جانە ءتورتىنشى كۇنى ەكەۋىنەن جاۋاپ كەلدى. ءقازىر مەن ءۇش ايدان بەرى باريستا بولىپ جۇمىس ىستەپ، تابىس تاۋىپ ءجۇرمىن، – دەدى ءابىلمانسۇر بايانحان.
ايتۋىنشا «JOLTAP» قالا تۇرعىندارى ءۇشىن وتە قاجەت جوبا. ول استانالىقتارعا ماماندىعىن اۋىستىرىپ قانا قويماي، سۇيىكتى ىسىمەن دە اينالىسۋعا مۇمكىندىك بەرەدى.
– كوپتەگەن ادام باعدارلاما تۋرالى كەڭىنەن بىلە الادى، وزدەرى ءۇشىن قىزىقتى سالانى تاڭداي الادى جانە بولاشاقتا ءتىپتى ءوز ءىسىن اشا الادى. جوبا ەلوردانىڭ ءاربىر تۇرعىنى ءۇشىن قولجەتىمدى مۇمكىندىكتەر بەرەدى، – دەدى ول.
جوبا اياسىندا ىڭعايلى وقىتۋ ءۇشىن قاجەتتى بارلىق زاتتارمەن جابدىقتالعان جەكەلەگەن وقۋ سىنىپتارىندا جۇرگىزىلەدى. ءوتۋ مەرزىمى – ءۇش كۇننەن ءبىر ايعا دەيىن.
بۇل جوباعا 18-50 جاس ارالىعىنداعى استانالىقتار قاتىسا الادى. سوڭىندا تۇلەكتەرگە سەرتيفيكاتتار بەرىلەدى.
