Abai oblysy, Besqaraǵai aýdanynda 300 oryndyq mektep paidalanýǵa berildi. «Jaily mektep» ulttyq jobasy aiasynda salynǵan bilim ordasynyń ashylý saltanatyna oblys ákimi Berik Ýáli, «Samuryq Qazyna konstrakshn» AQ basqarma tóraǵasy Máýlen Aimanbetov, bilim salasynyń ardagerleri jáne ata-analar qatysty, dep habarlaidy Dalanews.kz
Mektepte oqýshylardyń jan-jaqty bilim alýyna barlyq jaǵdai jasalǵan. Zamanaýi jabdyqtarmen qamtamasyz etilgen oqý ornynda 57 muǵalim eńbek etedi. 22 oqý kabineti, mýltimedialyq jáne jaratylystaný-ǵylymi pánderge arnalǵan zerthanalar, sport jáne shyǵarmashylyq úiirmeleri jumys isteidi. 120 oryndyq ashana, 100 oryndyq májilis zaly, interaktivti panelder, pándik kabinetter, kitaphana, oqý zaly bar. Sportpen shuǵyldanýǵa arnalǵan zaldar men ashyq alańdar, vorkaýt aimaqtary, dombyra úiirmesi siiaqty qosymsha bilim berý baǵyttary qarastyrylǵan.
Erekshe bilim berý qajettilikteri bar balalarǵa arnalǵan inkliýzivti orta da eskerilgen: pandýstar, taktildi joldar, arnaiy sanitarlyq toraptar ornatylǵan.
Aimaq basshysy mekteptiń ashylý saltanatynda sóilegen quttyqtaý sózinde bilim ordasynyń Besqaraǵai aýylynyń turǵyndary úshin mańyzy zor ekenin atap ótti.
«Memleket basshysy atap ótkendei, árbir oqýshynyń sapaly bilim alýyna memleket tarapynan qazirgi tańda barlyq jaǵdai jasalyp jatyr. «Jaily mektep» jobasy el igiligine, bilim men ǵylymdy shyńdaýǵa baǵyttalǵan baǵdarlama. Búgin, mine, oblysymyzda eki birdei jańa mektep paidalanýǵa berildi. Bul oqýshylar úshin, ata-analar úshin, muǵalimder úshin úlken mereke, aitýly kún. Biz bul baǵyttaǵy jumysty jalǵastyramyz. Óńirdegi mektepter kezeń-kezeńmen jańǵyryp, jańartylady», - dedi oblys ákimi.
Aimaq basshysy ashylý saltanatynan keiin qonaqtarmen birge mekteptiń kabinetteri, kitaphanasy, zerthanalaryn jáne sheberhanalaryn aralap, sport zaldary men fýtbol alańyn kórdi. Oqýshylarmen, muǵalimdermen pikirlesip, jańa mekteptegi jańa bastamalarǵa sáttilik tiledi.
