«Taza Qazaqstan» ekologiialyq aktsiiasynyń «Jasyl aimaq» aptalyǵy Borodýliha aýdanynda bastaldy. Aýdannyń «Semei ormany» aýmaǵynda «Semei ormany – jasyl aimaq» aǵash otyrǵyzý boiynsha keń aýqymdy aktsiia ótti.
Is-sharaǵa Abai oblysy ákimi Nurlan Uranhaev, oblystyq jáne aýdandyq máslihat depýtattary, ardagerler keńesiniń músheleri, belsendi jastar, stýdenttik uiymdar, eńbek uiymdary, Semei qalasy men Borodýliha aýdanynyń mekemelerinen 1 000 -nan asa adam qatysty.
«Búgin tutas el kóleminde keń qoldaýǵa ie bolǵan «Taza Qazaqstan» - ekologiialyq aktsiiasy sheńberinde, oblysymyzda erekshe mańyzy bar shara ótýde. Memleket basshysynyń tikelei bastamasymen júzege asqan bul aktsiianyń arqasynda Otanymyzdyń ár oblysy, qalasy men aýyly abattanyp, kóshetter otyrǵyzylyp, óńirimiz jańa keiipke enip keledi. Bul «Atadan mal qalǵansha, tal qalsyn» degen igi dástúrdiń jalǵasy», - dedi oblys ákimi Nurlan Uranhaev.
Bul naýqannyń negizgi maqsaty – kóshet otyrǵyzý arqyly ekologiiamyzdy jaqsartyp, qaraǵaily ormanymyzdy jedel qalpyna keltirý.
Aktsiia barysynda Voskresenovka aýylynyń mańyndaǵy orman alqabyndaǵy 5 ga aýmaqta 23 myńnan astam qaraǵai kósheti otyrǵyzyldy. Jalpy «Semei ormany» rezervatynda «Taza Qazaqstan» ekologiialyq aktsiiasy bastalǵannan beri 50 myńnan astam kóshet egilgen.
Aita keteiik, Borodýliha aýdanynyń aýmaǵy 698 992 ga jerdi alyp jatyr, onyń ishinde ormandy alqap – 87 773 ga bolsa, sý aidyndary – 14 301 ga. Biyl aýdan kóleminde 7 myńnan astam aǵash kóshetterin otyrǵyzý josparlanýda. Aǵash otyrǵyzý aktsiialary turaqty túrde ótkiziletin bolady.
