QMA Abai oblysy boiynsha departamenti «Dala SK Construction» JShS men oǵan bailanysy bar birqatar kompaniialardyń basshylyǵyna qatysty azamattardyń qarajatyn úlestik qurylys retinde zańsyz tartý faktileri boiynsha tergeýdi aiaqtady, dep habarlaidy Dalanews.kz.
Eki jyl boiy kompaniia basshylyǵy qajetti ruqsat berý qujattarynsyz, jobalyq-smetalyq qujattamasyz, memlekettik saraptama men avtorlyq qadaǵalaýsyz turǵyn úi keshenderin salýmen ainalysqan.
Azamattardyń qarajatyn tartý maqsatynda túrli internet-resýrstarda páterlerdiń naryqtan tómen baǵamen satylatyny jáne paiyzsyz bólip tóleý usynylatyny týraly jarnamalar jariialanǵan.
Alaida «Irtysh Riverside» turǵyn úi kesheniniń josparlanǵan alty munarasynyń tek bireýiniń ǵana qańqasy turǵyzylǵan.
2024 jylǵy qazanda «Dala SK Construction» JShS-ne ÁQBK-niń úsh baby boiynsha (zańsyz qurylys, jobalyq-smetalyq qujattamasyz qurylys, ruqsatsyz kásipkerlik qyzmet pen habarlama jibermesten áreket jasaý) ákimshilik jaza qoldanylyp, qurylys jumystary toqtatyldy.
Sot sheshimderine qaramastan, kompaniia basshylyǵy jobanyń sátti júzege asyp jatqandai kórinis jasap, azamattardy aldaýdy jalǵastyrǵan. Jańa satyp alýshylardy tartý úshin páterlerdiń satylymy men bólip tóleý jónindegi jarnamalar jalǵasa bergen.
Nátijesinde 64 azamatpen jalǵan brondaý sharttary jasalǵan.
Zańsyz tartylǵan qarajattyń jalpy somasy 1 mlrd teńgeden asty.
Túsken qarajat Óskemen qalasyndaǵy basqa da bailanysy bar kompaniialardyń shottaryna aýdarylyp, onda da zańsyz qurylys jumystary júrgizilgen.
Zalaldy óteý jáne úleskerlerdiń múddelerin qorǵaý maqsatynda kúdiktilerdiń múlkine - 2 páterge, 10 jer ýchaskesine jáne 6 avtokólikke tyiym salyndy.
Uiymdastyrýshy qamaýǵa alyndy. QR QPK-niń 201-babyna sáikes ózge aqparat jariialaýǵa jatpaidy.
