Abaı oblysynda aımaqtyń bilim berý júıesin sıfrlyq transformasıalaýdyń jańa kezeńin belgilegen «DIGITAL ABAI: JAŃA ZAMANDAǴY BİLİM BERÝ» atty pedagogterdiń tamyz konferensıasynyń plenarlyq otyrysy ótti, – dep habarlaıdy Dalanews.kz Abaı oblysy ákiminiń baspasóz qyzmetine silteme jasap.
Sesıa aıasynda sıfrlyq kórme ótip, onda stýdentter men mektep oqýshylarynyń startap jobalary, STEAM bilim berý salasyndaǵy ázirlemeler, sondaı-aq yńǵaıly jáne qaýipsiz sıfrlyq oqytý ortany qurýdyń jańa tásilderi usynyldy. Shara 530 qatysýshynyń basyn qosqanyn aıta ketýimiz kerek.
– Jahandyq sıfrlandyrý – bul ómir men óndiristiń ártúrli salalaryna engizilgen sıfrlyq tehnologıalarǵa negizdelgen ekonomıkalyq qyzmet tujyrymdamasy. Bul tujyrymdama barlyq elderde, sonyń ishinde qazirgi zamanǵy tásilder men tehnologıalardy paıdalana otyryp, qarqyndy damyp kele jatqan Abaı oblysynyń bilim berý júıesinde keńinen engizilýde, – dedi konferensıanyń ashylýynda sóz sóılegen Abaı oblysy ákimi Nurlan Uranhaev.
Aımaq basshysy oblysta jastardy qoldaý maqsatynda IT salasyndaǵy biryńǵaı komýnıkasıalyq keńistik – «Abai IT-Valley» qurylyp, tabysty jumys istep jatqanyn atap ótti.
Aldaǵy ýaqytta bolashaq mamandardy daıyndaıtyn İT kolejin ashý josparlanýda. Kolej eń joǵary talaptarǵa saı zamanaýı oqý quraldarymen jabdyqtalmaq. Osy turǵyda úzdiksiz oqytýdy qalyptastyrý úshin Zará aýdanyndaǵy jańa mektepte IT baǵytyna basymdyq beriledi. Erekshe balalar úshin jaǵdaı jasaýǵa, onyń ishinde aýtızm spektri buzylǵan balalarǵa arnalǵan ortalyq ashýǵa da aıryqsha kóńil bólinedi. 2023 jyly Semeı qalasynda ınklúzıvti bilim berýdi qoldaý maqsatynda «Asyl Mıras» aýtızm ortalyǵy ashyldy.
Sonymen qatar, balalarǵa arnalǵan qosymsha bilim berý nysandarynyń qurylysy negizgi máselelerdiń biri. Osy maqsatta oblys ortalyǵynda kópsalaly oqýshylar saraıynyń qurylysy bastaldy.
Plenarlyq otyrysta bilim berýdi sıfrlandyrý salasyndaǵy jetekshi sarapshylar sóz sóıledi. Jıynda bolashaqta óńirdiń bilim berý mekemelerinde iske asyrylatyn tájirıbe almasý jáne naqty sheshimder talqylandy.
Shara barysynda 2023-2024 oqý jylynda úzdik nátıje kórsetken bilim berý uıymdary men ustazdarǵa qurmet kórsetildi. Atap aıtqanda, «Y.Altynsarın» tósbelgisimen 6, «Bilim berý isiniń qurmetti qyzmetkeri» tósbelgisimen 8, «Eńbek ardageri» medalimen 5 pedagog marapattaldy. Sondaı-aq, 10 muǵalim oblys ákiminiń Alǵys hattaryn aldy.
Tamyz keńesi erteń seksıalyq jumystarmen jalǵasady. Seksıalyq jumystar mektepke deıingi bilim berýdegi ınovasıalar, jasandy ıntellektini orta bilim berý júıesine ıntegrasıalaý, tehnıkalyq jáne kásiptik bilim berý júıesindegi sıfrlandyrýdyń qazirgi basymdyqtary, aýyldyq mektepterde oqytý prosesin sıfrlandyrý, sıfrlyq mektep, pedagogterdiń sıfrlyq quzyrettilikterin damytý, sıfrlandyrý jaǵdaıynda ınklúzıvti bilim berý, balalardyń quqyqtaryn qorǵaý salasyndaǵy sıfrlandyrý, balalarǵa qosymsha bilim berýde jasandy ıntellekt pen sıfrlyq tehnologıalardy qoldaný, sıfrlandyrý jaǵdaıynda turaqty damý komponentin bilim berý mazmunyna ıntegrasıalaý syndy 10 baǵytty qamtıdy.
