"Ádildik joly" RQB atqarýshy direktory Didar Smaǵulov jemqorlyq shemalaryn ashyp, milliardtaǵan biýdjet aqshasy qaida ketip jatqanyn aitty, - dep habarlaidy Dalanews.kz.
Sarapshy keiingi ýaqytta daý bolyp jatqan QTJ jumysyna qatysty pikir bildirdi. Onyń pikirinshe, eks-premer Smaiylov óz jumysyna "jumsaq" baǵa berdi.
"Álihan myrza óz jumysyn tekserdi, óz jumysyn synady. Jalpy halyqaralyq aýditorlyq standarttaryna sai ol durys emes. Esebi jumsaǵyraq boldy dep aitýǵa bolady. (95 mlrd teńge bólingeni - esk.) ol bir ǵana baǵdarlama. Janarmaidy únemdeitin úlken jobany bastady, sońynda (qarjysy - esk.) 95 mlrdqa deiin jetti. Qolymyzǵa QTJ-nyń ishki aýdit qujattary tústi. Qujattardyń nátijesinde jumsalǵan 95 mlrd. teńge tiimsiz. Janarmai únemdelgen joq. 95 mlrd. teńge qaida ketkeni belgisiz. QTJ-nyń ishki aýdit qyzmetiniń qorytyndylary jariialansa, tańǵalamyz. Óitkeni ol jabyq aqparat. Eshkimge bermeidi, ishinde qalady", - dedi RQB atqarýshy direktory.
Sonymen qatar, Smaǵulovtyń aitýynsha, 2016 jyly Almatyda 4,7 mlrd. teńgege káriz qudyǵy salynýy úshin aqsha bólingen. Alaida bul joba qujat kúiinde qalǵan.
"Qujat boiynsha "salyndy". Qujat boiynsha bar. Káriz júiesi turǵan orynǵa bardym. Biraq ol áli qosylmaǵan. Júz paiyz aita alamyn, aiaǵyna deiin jumys bitken joq. Mamyr aiynda boldym, ishine tústim, ishinde jumystar áli bitken joq. Bul máseleni zerttedik. 2016 jyly 4,7 mlrd. teńge tólendi. "Almaty sý" degen mekeme bar, ákimshilik "káriz júiesin alyńdar" degen tapsyrma berdi. 2021 jyly "Almaty sý" "qabyldamaimyz" dedi. Óitkeni qanshama kemshilik bar?! Úsh jyl ótti, káriz júiesin áli eshkim qabyldaǵan joq, sol qalpynda tur. Akt boiynsha qabyldanǵan. Antikor "qylmystyq is toqtatyldy, eshqandai zalal joq" dedi. 4,7 mlrd. qaida, káriz júiesi qashan bolatynyn eshkim bilmeidi. Káriz júiesin Almatynyń qasyndaǵy aýyldar kútip otyr. Halyq qanshama aqsha ketkenin kórip otyr ǵoi", - dedi Smaǵulov Nartai Aralbaiulyna bergen suhbatynda.
Sarapshy jemqorlyq derekterine qatysty sumdyq jaittardy jariia etti. Tipti ol Qazaqstanda eń qymbat dárethanaǵa 30 mln. teńge jumsalǵanyn aitty.
"8 mln. teńge turatyn dárethana rekord emes eken. Eń qymbat dárethana Abai oblysynda eken. 30 mln. teńgeden kóp aqsha bólindi, igerildi. Áriptesterim de baryp qarady. Shok boldy. Qazaqstanda daladaǵy eń qymbat dárethana Abai oblysynda eken. Úidiń baǵasynan kóp. Qazir aryzdardy jazdyq, nátijesin kútip jatyrmyz. (Buǵan qarjy - esk.) oblystyq biýdjetten bólingen", - dedi ol Nartai Aralbaiulyna bergen suhbatynda.
Smaǵulovtyń aitýynsha, Abai oblysyna tekseris júrgizilgen. Tekseriste Semei qalasyn jaryqtandyrýǵa 2017-2023 jyldary 3,6 mlrd. teńge, 2023 jyly 1,2 mlrd. teńge bólingeni anyqtalǵan.
"2027-2023 jyldaǵy qarajat - qaryzǵa alǵan qarajat. "Jobany iske asyramyz, Óskemen men Semeide tún kúndei jaryq bolady, jaryq júiesi keremet bolady" dep aqsha shyǵardy. Jaqynda Abzal Quspan myrza aitqan. Bul máselede Danial Ahmetovtiń tikelei qatysy bar. Biraq bizdiń eń tańǵalǵanymyz, 2023 jyly qaitadan sol jumystarǵa biýdjetten 1,2 mlrd. teńge bólinedi. Biraq Semei men Óskemende aiyna jaryq on bes ret sónedi", - deidi ol.
