"ادىلدىك جولى" رقب اتقارۋشى ديرەكتورى ديدار سماعۇلوۆ جەمقورلىق سحەمالارىن اشىپ، ميللياردتاعان بيۋدجەت اقشاسى قايدا كەتىپ جاتقانىن ايتتى، - دەپ حابارلايدى Dalanews.kz.
ساراپشى كەيىنگى ۋاقىتتا داۋ بولىپ جاتقان قتج جۇمىسىنا قاتىستى پىكىر ءبىلدىردى. ونىڭ پىكىرىنشە، ەكس-پرەمەر سمايىلوۆ ءوز جۇمىسىنا "جۇمساق" باعا بەردى.
"ءاليحان مىرزا ءوز جۇمىسىن تەكسەردى، ءوز جۇمىسىن سىنادى. جالپى حالىقارالىق اۋديتورلىق ستاندارتتارىنا ساي ول دۇرىس ەمەس. ەسەبى جۇمساعىراق بولدى دەپ ايتۋعا بولادى. (95 ملرد تەڭگە بولىنگەنى - ەسك.) ول ءبىر عانا باعدارلاما. جانارمايدى ۇنەمدەيتىن ۇلكەن جوبانى باستادى، سوڭىندا (قارجىسى - ەسك.) 95 ملردقا دەيىن جەتتى. قولىمىزعا قتج-نىڭ ىشكى اۋديت قۇجاتتارى ءتۇستى. قۇجاتتاردىڭ ناتيجەسىندە جۇمسالعان 95 ملرد. تەڭگە ءتيىمسىز. جانارماي ۇنەمدەلگەن جوق. 95 ملرد. تەڭگە قايدا كەتكەنى بەلگىسىز. قتج-نىڭ ىشكى اۋديت قىزمەتىنىڭ قورىتىندىلارى جاريالانسا، تاڭعالامىز. ويتكەنى ول جابىق اقپارات. ەشكىمگە بەرمەيدى، ىشىندە قالادى"، - دەدى رقب اتقارۋشى ديرەكتورى.
سونىمەن قاتار، سماعۇلوۆتىڭ ايتۋىنشا، 2016 جىلى الماتىدا 4،7 ملرد. تەڭگەگە كارىز قۇدىعى سالىنۋى ءۇشىن اقشا بولىنگەن. الايدا بۇل جوبا قۇجات كۇيىندە قالعان.
"قۇجات بويىنشا "سالىندى". قۇجات بويىنشا بار. كارىز جۇيەسى تۇرعان ورىنعا باردىم. ءبىراق ول ءالى قوسىلماعان. ءجۇز پايىز ايتا الامىن، اياعىنا دەيىن جۇمىس بىتكەن جوق. مامىر ايىندا بولدىم، ىشىنە ءتۇستىم، ىشىندە جۇمىستار ءالى بىتكەن جوق. بۇل ماسەلەنى زەرتتەدىك. 2016 جىلى 4،7 ملرد. تەڭگە تولەندى. "الماتى سۋ" دەگەن مەكەمە بار، اكىمشىلىك "كارىز جۇيەسىن الىڭدار" دەگەن تاپسىرما بەردى. 2021 جىلى "الماتى سۋ" "قابىلدامايمىز" دەدى. ويتكەنى قانشاما كەمشىلىك بار؟! ءۇش جىل ءوتتى، كارىز جۇيەسىن ءالى ەشكىم قابىلداعان جوق، سول قالپىندا تۇر. اكت بويىنشا قابىلدانعان. انتيكور "قىلمىستىق ءىس توقتاتىلدى، ەشقانداي زالال جوق" دەدى. 4،7 ملرد. قايدا، كارىز جۇيەسى قاشان بولاتىنىن ەشكىم بىلمەيدى. كارىز جۇيەسىن الماتىنىڭ قاسىنداعى اۋىلدار كۇتىپ وتىر. حالىق قانشاما اقشا كەتكەنىن كورىپ وتىر عوي"، - دەدى سماعۇلوۆ نارتاي ارالبايۇلىنا بەرگەن سۇحباتىندا.
ساراپشى جەمقورلىق دەرەكتەرىنە قاتىستى سۇمدىق جايتتاردى جاريا ەتتى. ءتىپتى ول قازاقستاندا ەڭ قىمبات دارەتحاناعا 30 ملن. تەڭگە جۇمسالعانىن ايتتى.
"8 ملن. تەڭگە تۇراتىن دارەتحانا رەكورد ەمەس ەكەن. ەڭ قىمبات دارەتحانا اباي وبلىسىندا ەكەن. 30 ملن. تەڭگەدەن كوپ اقشا ءبولىندى، يگەرىلدى. ارىپتەستەرىم دە بارىپ قارادى. شوك بولدى. قازاقستاندا دالاداعى ەڭ قىمبات دارەتحانا اباي وبلىسىندا ەكەن. ءۇيدىڭ باعاسىنان كوپ. ءقازىر ارىزداردى جازدىق، ناتيجەسىن كۇتىپ جاتىرمىز. (بۇعان قارجى - ەسك.) وبلىستىق بيۋدجەتتەن بولىنگەن"، - دەدى ول نارتاي ارالبايۇلىنا بەرگەن سۇحباتىندا.
سماعۇلوۆتىڭ ايتۋىنشا، اباي وبلىسىنا تەكسەرىس جۇرگىزىلگەن. تەكسەرىستە سەمەي قالاسىن جارىقتاندىرۋعا 2017-2023 جىلدارى 3،6 ملرد. تەڭگە، 2023 جىلى 1،2 ملرد. تەڭگە بولىنگەنى انىقتالعان.
"2027-2023 جىلداعى قاراجات - قارىزعا العان قاراجات. "جوبانى ىسكە اسىرامىز، وسكەمەن مەن سەمەيدە ءتۇن كۇندەي جارىق بولادى، جارىق جۇيەسى كەرەمەت بولادى" دەپ اقشا شىعاردى. جاقىندا ابزال قۇسپان مىرزا ايتقان. بۇل ماسەلەدە دانيال احمەتوۆتىڭ تىكەلەي قاتىسى بار. ءبىراق ءبىزدىڭ ەڭ تاڭعالعانىمىز، 2023 جىلى قايتادان سول جۇمىستارعا بيۋدجەتتەن 1،2 ملرد. تەڭگە بولىنەدى. ءبىراق سەمەي مەن وسكەمەندە ايىنا جارىق ون بەس رەت سونەدى"، - دەيدى ول.
