Abaı oblysynda «Taza Qazaqstan» baǵdarlamasy aıasynda ekologıalyq aksıalar jalǵasýda. Tazalyq sharasyna jastar, Polısıa departamenti, etno-mádenı birlestikter men úkimettik emes uıymdardyń ókilderi qatysyp, qala shetindegi Semeı-Astana tasjoly boıyn qoqystan tazalady. Qatysýshylar qorshaǵan ortany qorǵaýǵa óz úlesterin qosyp, ekologıalyq mádenıetti dáripteýdiń mańyzdylyǵyn kórsetti, dep habarlaıdy Dalanews.kz
«Shyǵys jastary» qoǵamdyq qorynyń atqarýshy dırektory Alıbı Abdýraımov aksıanyń mańyzdylyǵy jaıynda pikir bildirip, turǵyndardy tazalyqty saqtaýǵa shaqyrdy.
– Bul shara Memleket basshysy Qasym-Jomart Toqaevtyń bastamasymen júzege asyp jatqan «Taza Qazaqstan» baǵdarlamasy aıasynda júzege asyrylýda. Aksıa barysynda Semeı – Astana baǵytyndaǵy qalanyń kórikti aımaǵy tazartyldy. Negizgi maqsat – óńir turǵyndary arasynda qorshaǵan ortany taza ustaý mádenıetin qalyptastyrý. Búgingi aksıaǵa 50-den astam adam qatysyp, belsendilik tanytty. Qalamyzdyń tazalyǵy – barlyǵymyzdyń ortaq mindetimiz. Barsha turǵyndardy tabıǵatty aıalaýǵa, mundaı sharalarǵa belsene qatysýǵa shaqyramyn, – dedi ol.
Jalpy, «Taza Qazaqstan» baǵdarlamasy aıasynda jyl basynan oblysta 282 381 adam, onyń ishinde 13 585 uıym men mekeme ókilderi qatysty. Jumysqa 8558 birlik tehnıka jumyldyryldy. Nátıjesinde 157 072 aýla tazalanyp, 49 467 tonna qatty turmystyq qaldyqtar (QTQ) polıgondaryna shyǵaryldy. Oblys boıynsha 2443 saıabaq pen skver tazartylyp, 1001 eskertkishtiń aınalasy abattandyrylyp, 10 285 sharshy metr tasjol jóndeldi. 50 201 aǵash jáne 7 883 buta otyrǵyzyldy. Senbilik 16 811 áleýmettik jáne óndiristik nysandy, sondaı-aq 2 287 jasandy sý qoımasyn qamtydy.
