Uly Otan soǵysyndaǵy Jeńistiń 80 jyldyǵyna orai elimizde «80 alǵys sóz» atty patriottyq fleshmob bastaý aldy. Búgin bul igi bastamaǵa Abai oblysy da qosyldy. Aktsiiaǵa qatysýshylar ardagerlerge degen alǵystaryn bildirip, beibit ómirdiń, bostandyq pen ata-babalar erliginiń qadirin atap ótken beinejoldaýlar jazyp, mátindik jazbalar jariialaýda, - dep habarlaidy Dalanews.kz
Fleshmob áleýmettik jelilerde #UlyJeńis, #DenPobedy, #80SlovBlagodarnosti, #80letPobede, #80AlǵysSóz, #JeńisÚshinRaqmet heshtegtermen ótýde. Ár óńirde áleýmettik jelilerde fotosýretter, beinematerialdar men jeke oqiǵalarmen bólisilgen jazbalar jariialanýda. Uiymdastyrýshylar ásirese jastardyń belsendiligin atap ótti.
Kókpekti aýdanynyń belsendi jastar ókili Nazym Kelerbekova osy chellendjge qatysyp, óz oiymen bólisti.
- Búgin biz beibit elde, táýelsiz memlekette, ashyq aspan astynda ómir súrip otyrsaq – bul eń aldymen Sizderdiń janqiiar erlikterińizdiń, qajyrly eńbekterińizdiń, Otanǵa degen sheksiz súiispenshilikterińizdiń arqasy. Surapyl soǵys jyldarynda Sizder týǵan jer úshin, bolashaq urpaq úshin keýdelerińizdi oqqa tostyńyzdar. Jas ómirlerińizdi qurban etip, urpaq amandyǵy úshin aianbai kúrestińizder. Sizderdiń maidandaǵy jaýyngerlik erlikterińiz ben tyldaǵy jankeshti eńbekterińiz – máńgi el esinde, – dep atap ótti ol.
Aiagóz aýdandyq máslihatynyń tóraǵasy Arhat Ibraishin ákesi týraly esteligimen bólisti.
– Ákem – I dárejeli «Uly Otan soǵysy», III dárejeli «Dańq» ordenderiniń, jáne kóptegen medaldardyń iegeri. Biraq men úshin onyń eń úlken marapaty – urpaǵynyń qurmeti, eli men halqynyń ystyq yqylasy. Búginde ol aramyzda bolmasa da, onyń erligi men ónegesi – bizdiń júregimizde. Biz Ákemizben árdaiym maqtanamyz, – dep jazdy Arhat Ibraishin áleýmettik jelidegi paraqshasynda.
Atalǵan aktsiia 15 sáýirde Shymkent pen Atyraý oblysynda bastalǵan bolatyn. 16 sáýirde chellendjge Aqtóbe men Qaraǵandy oblystary qosyldy. Endi alǵys estafetasy Túrkistan oblysy men Abai óńirine de jetti.
Uiymdastyrýshylar oblys turǵyndaryn igi iske atsalysyp, ardagerlerge júrekten shyqqan shynaiy alǵys sózderin jetkizýge shaqyrady.
