Keshe Taldyqorǵan qalasynda elimizdiń jańa Ata Zańynyń kúshine enýine orai «Jańa Konstitýtsiia – Ádiletti Qazaqstannyń berik negizi» atty aýqymdy konferentsiia ótti. Jiynǵa belgili qoǵam qairatkerleri, ǵylym jáne bilim salasynyń ókilderi, zańgerler, azamattyq sektor belsendileri men jastar qatysyp, Konstitýtsiianyń saiasi jáne quqyqtyq reformalardyń berik irgetasy retindegi mańyzyn talqylady, dep habarlaidy dalanews.kz.
Is-sharaǵa Jetisý oblysy ákiminiń orynbasary Dias Esdáýletov moderatorlyq etti. Konferentsiiany ashyp, qatysýshylardy el ómirindegi mańyzdy merekemen quttyqtaǵan ol jańartylǵan Konstitýtsiianyń kúshine enýi árbir azamat úshin airyqsha mánge ie tarihi oqiǵa ekenin atap ótti.
Dias Esdáýletovtiń aitýynsha, jańa Konstitýtsiia qoǵamnyń ádilettilikke, ashyqtyqqa jáne teń múmkindikterge degen suranysyn aiqyn kórsetedi. Onyń negizinde zańnyń ústemdigi, adam quqyqtaryn qurmetteý, biliktiń jaýapkershiligi, urpaqtar sabaqtastyǵy jáne qoǵam birligi siiaqty memleket pen halyq úshin asa mańyzdy qaǵidattar jatyr. Ol ádiletti memleket qarapaiym ári túsinikti qaǵidattan bastalatynyn atap ótti, iaǵni ár azamat turǵylyqty jerine, mamandyǵyna, jasyna nemese áleýmettik jaǵdaiyna qaramastan ózin zańnyń qorǵaýynda sezinip, óz áleýetin tolyq júzege asyrýǵa múmkindik alýy tiis.
Atap ótsek, jańa Konstitýtsiiany ázirleý jónindegi usynystardy pysyqtaýmen ainalysqan Konstitýtsiialyq reforma jónindegi komissiianyń jumysyna Jetisý oblysynyń atynan oblystyq máslihattyń tóraǵasy Gúlnár Toilybaeva qatysqan bolatyn. Konferentsiiada sóz sóilegen Gúlnár Qojageldiqyzy Qazaqstan Respýblikasy Parlamenti palatalarynyń birlesken qorytyndy otyrysynda Memleket basshysy zań shyǵarýshy organnyń joǵary missiiasyna erekshe toqtalǵanyn atap ótti. Sonymen qatar ol Konstitýtsiiada ádilettilik, «Zań men Tártip», tabiǵatqa uqypty qaraý siiaqty jańa qundylyqtardyń bekitilgenine nazar aýdardy. Bul memlekettik organdar sheshim qabyldaý kezinde tek búgingi mindetterdi ǵana emes, qoǵamnyń uzaq merzimdi múddelerin de basshylyqqa alýy qajet ekenin aiqyndaidy.
Konferentsiia qatysýshylaryna Qazaqstan Respýblikasy Prezidentiniń janyndaǵy Ulttyq quryltaidyń múshesi, «Jetisý oblysynyń Azamattyq aliansy» zańdy tulǵalar birlestiginiń tóraǵasy Daniia Qydyrbaeva beineúndeý arqyly quttyqtaý joldady. Ol óz sózinde jańartylǵan Konstitýtsiia elimiz úshin jańa quqyqtyq kezeńniń bastamasy ǵana emes, sonymen qatar azamattyq qoǵamdy damytýǵa tyń múmkindikter ashatynyn atap ótti. Onyń aitýynsha, búgingi tańda memleket pen qoǵamnyń bir-birin tyńdap, mańyzdy máselelerdi birlesip talqylap, halyqtyń naqty suranysyna sai keletin sheshimder qabyldaýynyń mańyzy zor.
Sondai-aq jiynda oblystyq qoǵamdyq keńestiń tóraǵasy Áset Qydyrmanov, I. Jansúgirov atyndaǵy Jetisý ýniversitetiniń basqarma tóraǵasy – rektory, zań ǵylymdarynyń doktory, professor Ermek Bóribaev, oblys prokýrorynyń orynbasary Birlik Izbasarov, Qazaqstan Respýblikasyndaǵy Adam quqyqtary jónindegi ýákildiń Jetisý oblysy boiynsha ókili Qanat Qarymsaqov jáne basqa da spikerler sóz sóiledi.
Talqylaý barysynda qatysýshylar teńdik, inkliýziia, quqyqtyq mádeniet, qoǵamdyq dialog, tsifrlyq quqyqtar jáne bolashaq urpaq aldyndaǵy jaýapkershilik t.b. máselelerge toqtaldy. Bul taqyryptar jańa Konstitýtsiiamen tikelei bailanysty, óitkeni qazirgi zamanǵy memleket barshaǵa – erekshe qajettiligi bar azamattarǵa, jastarǵa, túrli qoǵamdyq birlestikter ókilderine, bilim, aqparat jáne tsifrlyq tehnologiialar salasynda jumys isteitin mamandarǵa – yńǵaily, ashyq ári ádiletti bolýy tiis.
Osy kúni aitylǵan oilardyń jalpy mazmuny bir arnaǵa toǵysty: jańa Konstitýtsiia kúndelikti ómirde naqty jumys isteýi tiis. Ol tek zańgerlerge, memlekettik qyzmetshilerge nemese depýtattarǵa ǵana emes, árbir adamǵa qatysty. Iaǵni, bul - ár azamattyń ádil qarym-qatynasqa quqyǵy, sapaly bilim alýy, jeke derekteriniń qorǵalýy, quqyqtyq kómekke qoljetimdiligi, qoǵam ómirine qatysý múmkindigi.
Konferentsiia sońynda Jetisý oblysy ákiminiń orynbasary Dias Esdáýletov talqylaýdy qorytyndylap, jańa Konstitýtsiianyń kúshine enýi tek quqyqtyq oqiǵa ǵana emes, sonymen qatar qoǵamdyq jańǵyrýdyń mańyzdy kezeńi ekenin atap ótti.
Is-shara aiasynda qatysýshylarǵa jańa Konstitýtsiianyń arnaiy basylymy tabystaldy.
