ۇلى وتان سوعىسىنداعى جەڭىستىڭ 80 جىلدىعىنا وراي ەلىمىزدە «80 العىس ءسوز» اتتى پاتريوتتىق فلەشموب باستاۋ الدى. بۇگىن بۇل يگى باستاماعا اباي وبلىسى دا قوسىلدى. اكسياعا قاتىسۋشىلار ارداگەرلەرگە دەگەن العىستارىن ءبىلدىرىپ، بەيبىت ءومىردىڭ، بوستاندىق پەن اتا-بابالار ەرلىگىنىڭ ءقادىرىن اتاپ وتكەن بەينەجولداۋلار جازىپ، ماتىندىك جازبالار جاريالاۋدا، - دەپ حابارلايدى Dalanews.kz
فلەشموب الەۋمەتتىك جەلىلەردە #ۇلىجەڭىس، #دەنپوبەدى، #80سلوۆبلاگودارنوستي، #80لەتپوبەدە، #80ءالعىسسوز، #جەڭىسۇشىنراقمەت حەشتەگتەرمەن وتۋدە. ءار وڭىردە الەۋمەتتىك جەلىلەردە فوتوسۋرەتتەر، بەينەماتەريالدار مەن جەكە وقيعالارمەن بولىسىلگەن جازبالار جاريالانۋدا. ۇيىمداستىرۋشىلار اسىرەسە جاستاردىڭ بەلسەندىلىگىن اتاپ ءوتتى.
كوكپەكتى اۋدانىنىڭ بەلسەندى جاستار وكىلى نازىم كەلەربەكوۆا وسى چەللەندجگە قاتىسىپ، ءوز ويىمەن ءبولىستى.
- بۇگىن ءبىز بەيبىت ەلدە، تاۋەلسىز مەملەكەتتە، اشىق اسپان استىندا ءومىر ءسۇرىپ وتىرساق – بۇل ەڭ الدىمەن سىزدەردىڭ جانقيار ەرلىكتەرىڭىزدىڭ، قاجىرلى ەڭبەكتەرىڭىزدىڭ، وتانعا دەگەن شەكسىز سۇيىسپەنشىلىكتەرىڭىزدىڭ ارقاسى. سۇراپىل سوعىس جىلدارىندا سىزدەر تۋعان جەر ءۇشىن، بولاشاق ۇرپاق ءۇشىن كەۋدەلەرىڭىزدى وققا توستىڭىزدار. جاس ومىرلەرىڭىزدى قۇربان ەتىپ، ۇرپاق اماندىعى ءۇشىن ايانباي كۇرەستىڭىزدەر. سىزدەردىڭ مايدانداعى جاۋىنگەرلىك ەرلىكتەرىڭىز بەن تىلداعى جانكەشتى ەڭبەكتەرىڭىز – ماڭگى ەل ەسىندە، – دەپ اتاپ ءوتتى ول.
اياگوز اۋداندىق ءماسليحاتىنىڭ ءتوراعاسى ارحات يبرايشين اكەسى تۋرالى ەستەلىگىمەن ءبولىستى.
– اكەم – I دارەجەلى «ۇلى وتان سوعىسى»، III دارەجەلى «داڭق» وردەندەرىنىڭ، جانە كوپتەگەن مەدالداردىڭ يەگەرى. ءبىراق مەن ءۇشىن ونىڭ ەڭ ۇلكەن ماراپاتى – ۇرپاعىنىڭ قۇرمەتى، ەلى مەن حالقىنىڭ ىستىق ىقىلاسى. بۇگىندە ول ارامىزدا بولماسا دا، ونىڭ ەرلىگى مەن ونەگەسى – ءبىزدىڭ جۇرەگىمىزدە. ءبىز اكەمىزبەن ءاردايىم ماقتانامىز، – دەپ جازدى ارحات يبرايشين الەۋمەتتىك جەلىدەگى پاراقشاسىندا.
اتالعان اكسيا 15 ساۋىردە شىمكەنت پەن اتىراۋ وبلىسىندا باستالعان بولاتىن. 16 ساۋىردە چەللەندجگە اقتوبە مەن قاراعاندى وبلىستارى قوسىلدى. ەندى العىس ەستافەتاسى تۇركىستان وبلىسى مەن اباي وڭىرىنە دە جەتتى.
ۇيىمداستىرۋشىلار وبلىس تۇرعىندارىن يگى ىسكە اتسالىسىپ، ارداگەرلەرگە جۇرەكتەن شىققان شىنايى العىس سوزدەرىن جەتكىزۋگە شاقىرادى.
