Abai oblysynda 76 jastaǵy zeinetker dáriger Eńbek jáne halyqty áleýmettik qorǵaý ministrliginiń Halyqty áleýmettik qorǵaý salasyn retteý jáne baqylaý komitetine qarsy sotta jeńip shyqty. Sot onyń zeinetaqysyn qaita esepteý jóninde oń sheshim qabyldady, dep habarlaidy Dalanews.kz.
Sot qujattaryna sáikes, ájei zeinetke shyǵarda barlyq eńbek ótilin qosa eseptetip, tiisti qujattaryn tapsyrǵan. Alaida ýákiletti organ onyń 1993 jyldyń tamyzynan 1994 jyldyń shildesine deiingi tabysyn nebári 56,76 teńge dep kórsetken.
Zeinetker bul derekke kelispei, sol ýaqytta tek qalalyq aýrýhanada emes, sonymen qatar jeke firmada qosymsha jumys istegenin dáleldedi. Sol mekemede onyń ailyq tabysy myń teńge bolǵan.
Sot sheshiminde kórsetilgendei, daý 2003 jyly zeinetaqyny qaita esepteý kezinde týyndaǵan. Ol kezde Úkimettiń №564 qaýlysyna sáikes tabysty esepteýdiń eki túrli nusqasy bolǵan, biraq ýákiletti organ zeinetker úshin eń tiimsiz nusqany tańdap, onyń zeinetaqysyn azaityp jibergen.
"1994 jyly alǵash ret zeinetaqy taǵaiyndalǵanda qosymsha tabys eskerilmegen. Bul zeinetaqy kóleminiń ádiletsiz tómendeýine sebep bolǵan. Sot zeinetkerdiń paidasyna sheshim shyǵaryp, onyń naqty tabysy myń teńge negizinde qaita esepteýge buiryq berdi", — delingen sot habarlamasynda.
