Abaı oblysynyń ákimi Berik Ýálı halyqaralyq «Úlken Altaı» sýbóńirlik yntymaqtastyq konferensıasy aıasynda Qytaıdyń Shyńjań uıǵyr avtonomıaly ólkesi Tachen (Tarbaǵataı) aımaǵynyń partıa komıtetiniń hatshysy Chjı Sánveımen kezdesti, dep habarlaıdy Dalanews.kz
Kezdesý barysynda Abaı oblysy men Tachen (Sháýeshek) qalasy arasyndaǵy arasyndaǵy eki jaqty yntymaqtastyqty damytý máseleleri talqylandy.
Aımaq basshysy Abaı oblysy men Shyńjań uıǵyr avtonomıaly ólkesi arasyndaǵy shekaranyń uzyndyǵy 250 shaqyrymnan asatynyn, onyń ishinde Baqty keden beketiniń mańyzdy ról atqaratynyn aıtty. Oblystyń strategıalyq temirjol, avtomobıl, áýe jáne sý kóligi baǵyttarynyń qıylysynda ornalasýy tranzıttik áleýetti arttyrýǵa múmkindik beretinin atap ótti.
Ol Semeı qalasynda halyqaralyq talaptarǵa saı áýejaı jumys isteıtinin aıtyp, "Semeı-Úrimji-Semeı" jáne "Semeı-Tachen" baǵyttarynda áýe reısin ashý týraly usynysyn jetkizdi.
Tachen (Tarbaǵataı) aımaǵynyń partıa komıtetiniń hatshysy Chjı Sánveı "Aıagóz-Tachen" temir jol jelisi men "Semeı-Tachen" baǵyttaryndaǵy áýe reısteriniń mańyzdy ekenine toqtalyp, Baqty keden beketiniń jumysyn jandandyrýǵa baılanysty usynystaryn aıtty.
Aımaq basshysy kezdesýde aıtylǵan usynystar jan jaqty qarastyrylatyn, "Aıagóz-Tachen" temir joly qurylysy Prezıdent tapsyrmasyna sáıkes bıyl bastalatynyn jetkizdi.
Oblys ákimi Altaı qalasyndaǵy jumys sapary barysynda Mońǵolıanyń Baıan-Ólgeı aımaǵynyń gýbernatorynyń orynbasary Baqytjan Qaǵbatuly bastaǵan delegasıamen de kezdesti. Baıan-Ólgeı aımaǵynyń ókilderi kezdesýde Semeı men Baıan-Ólgeı qalalary arasynda áýe reısin ashý, mal sharýashylyǵy ónimderin ótkizýge, týrızmdi damytýǵa qatysty usynystaryn aıtty.
«Eki el arasyndaǵy yntymaqtastyqty jandandyrýǵa daıynbyz. "Baıan-Ólgeı-Semeı" baǵytynda áýe reısterin ashý boıynsha eki el Úkimetiniń Syrtqy ister mınıstrliginiń deńgeıinde tezirek sheshilýine yqpal etetin bolamyz. Sondaı-aq Semeıdegi et kombınatyna mal etin tasymaldaýdy ulǵaıtý boıynsha usynystaryńyzdy qoldaımyz. Jáne eki el arasyndaǵy týrızmdi damytýǵa múddelimiz”, - dedi oblys ákimi.
