اباي وبلىسىنىڭ اكىمى بەرىك ءۋالي حالىقارالىق «ۇلكەن التاي» سۋبوڭىرلىك ىنتىماقتاستىق كونفەرەنسياسى اياسىندا قىتايدىڭ شىڭجاڭ ۇيعىر اۆتونوميالى ولكەسى تاچەن (تارباعاتاي) ايماعىنىڭ پارتيا كوميتەتىنىڭ حاتشىسى چجي سيانۆەيمەن كەزدەستى، دەپ حابارلايدى Dalanews.kz
كەزدەسۋ بارىسىندا اباي وبلىسى مەن تاچەن (شاۋەشەك) قالاسى اراسىنداعى اراسىنداعى ەكى جاقتى ىنتىماقتاستىقتى دامىتۋ ماسەلەلەرى تالقىلاندى.
ايماق باسشىسى اباي وبلىسى مەن شىڭجاڭ ۇيعىر اۆتونوميالى ولكەسى اراسىنداعى شەكارانىڭ ۇزىندىعى 250 شاقىرىمنان اساتىنىن، ونىڭ ىشىندە باقتى كەدەن بەكەتىنىڭ ماڭىزدى ءرول اتقاراتىنىن ايتتى. وبلىستىڭ ستراتەگيالىق تەمىرجول، اۆتوموبيل، اۋە جانە سۋ كولىگى باعىتتارىنىڭ قيىلىسىندا ورنالاسۋى ترانزيتتىك الەۋەتتى ارتتىرۋعا مۇمكىندىك بەرەتىنىن اتاپ ءوتتى.
ول سەمەي قالاسىندا حالىقارالىق تالاپتارعا ساي اۋەجاي جۇمىس ىستەيتىنىن ايتىپ، "سەمەي-ۇرىمجى-سەمەي" جانە "سەمەي-تاچەن" باعىتتارىندا اۋە رەيسىن اشۋ تۋرالى ۇسىنىسىن جەتكىزدى.
تاچەن (تارباعاتاي) ايماعىنىڭ پارتيا كوميتەتىنىڭ حاتشىسى چجي سيانۆەي "اياگوز-تاچەن" تەمىر جول جەلىسى مەن "سەمەي-تاچەن" باعىتتارىنداعى اۋە رەيستەرىنىڭ ماڭىزدى ەكەنىنە توقتالىپ، باقتى كەدەن بەكەتىنىڭ جۇمىسىن جانداندىرۋعا بايلانىستى ۇسىنىستارىن ايتتى.
ايماق باسشىسى كەزدەسۋدە ايتىلعان ۇسىنىستار جان جاقتى قاراستىرىلاتىن، "اياگوز-تاچەن" تەمىر جولى قۇرىلىسى پرەزيدەنت تاپسىرماسىنا سايكەس بيىل باستالاتىنىن جەتكىزدى.
وبلىس اكىمى التاي قالاسىنداعى جۇمىس ساپارى بارىسىندا موڭعوليانىڭ بايان-ولگەي ايماعىنىڭ گۋبەرناتورىنىڭ ورىنباسارى باقىتجان قاعبات ۇلى باستاعان دەلەگاسيامەن دە كەزدەستى. بايان-ولگەي ايماعىنىڭ وكىلدەرى كەزدەسۋدە سەمەي مەن بايان-ولگەي قالالارى اراسىندا اۋە رەيسىن اشۋ، مال شارۋاشىلىعى ونىمدەرىن وتكىزۋگە، ءتۋريزمدى دامىتۋعا قاتىستى ۇسىنىستارىن ايتتى.
«ەكى ەل اراسىنداعى ىنتىماقتاستىقتى جانداندىرۋعا دايىنبىز. "بايان-ولگەي-سەمەي" باعىتىندا اۋە رەيستەرىن اشۋ بويىنشا ەكى ەل ۇكىمەتىنىڭ سىرتقى ىستەر مينيسترلىگىنىڭ دەڭگەيىندە تەزىرەك شەشىلۋىنە ىقپال ەتەتىن بولامىز. سونداي-اق سەمەيدەگى ەت كومبيناتىنا مال ەتىن تاسىمالداۋدى ۇلعايتۋ بويىنشا ۇسىنىستارىڭىزدى قولدايمىز. جانە ەكى ەل اراسىنداعى ءتۋريزمدى دامىتۋعا مۇددەلىمىز”، - دەدى وبلىس اكىمى.
