Qazaqstannyń Reseidegi elshisi Dáýren Abaev Ramzan Qadyrovtyń uly – Adam Qadyrovtyń úilený toiyna barǵanyn rastady, dep habarlaidy Dalanews.kz Orda.kz-ke siltep.
Sheshenstan basshysynyń 17 jastaǵy ulynyń úilený toiy ótken demalys kúnderi ótti. 30 maýsymda Ramzan Qadyrov óziniń Telegram-arnasynda ulynyń qýanyshyna ortaqtasýǵa kelgen mártebeli meimandarǵa alǵys bildirip, jazba jariialady. Ol onda birqatar eldiń elshilerin atady.
«Dostar, osy kúnderi Groznyida men erekshe qurmetteitin kóptegen qadirli meimandardy, sonyń ishinde Iran, BAÁ, Túrkiia jáne Qazaqstan elshilerin qarsy alǵanyma qýanyshtymyn. Olardyń barlyǵy bizdiń otbasymyzdy Adamnyń úilený toiymen quttyqtaýǵa keldi. Adam – Sheshenstan Respýblikasynyń tuńǵysh prezidenti, Resei Batyry Ahmat-Hadji Qadyrovtyń nemeresi», – dep jazdy Qadyrov.
Bul málimdemeden keiin jýrnalister Qazaqstan elshisi Dáýren Abaevpen bailanysyp, onyń rasynda toiǵa barǵan-barmaǵanyn jáne qai mártebede barǵanyn surady.
«Men tek Máskeýde emes, Resei Federatsiiasyndaǵy elshi bolyp tabylamyn. Sondyqtan óńirlerge jii baramyn. Qazaq pen sheshen halyqtaryn tereń ári tarihi dostyq bailanystyrady. Biz sheshen halqynyń Qazaqstanǵa jer aýdarylǵanyn umytqan joqpyz.
Al olar qazaq halqynyń sol qiyn sátte qoldaý kórsetkenin umytpady. Men bul toiǵa eń aldymen osy dostyqtyń belgisi retinde bardym», – dedi Abaev.
