Talaı sport sańlaqtaryn tárbıelep shyǵarǵan Qazaq sport jáne týrızm akademıasynyń 80 jyldyq mereıtoıy joǵary deńgeıde ótti.
Aldymen bilim ordasynyń bas ǵımaratynda «Olımpıadalyq sport jáne barlyǵyna arnalǵan sport» atty XXVIII Halyqaralyq ǵylymı Kongres ótti. Plenarlyq májiliske belgili ǵalymdar, qoǵam qaıratkerleri, Qazaq sport jáne týrızm akademıasy jáne seriktes ýnıversıtetterdiń, sondaı-aq Halyqaralyq dene shynyqtyrý jáne sport ýnıversıtetteri qaýymdastyǵynyń músheleri qatysty. Sport salasyndaǵy mańyzdy máseleler týraly baıandamalar jasaldy. 20-dan asa memleketten kelgen sheteldik ǵalymdar aýqymdy sharaǵa qatysyp, áserge toly merekelik keshtiń kýási boldy.
Merekelik keshte talaı jyl eńbek etken ustazdar men ǵalymdar marapattaldy. Ásem án men erekshe sporttyq qoıylymdar jınalǵan jurtty tánti etti. Akademıa túlekteri, Olımpıada júldegerleri men zıaly qaýym ókilderi, basqa da joǵary oqý ornynan kelgen qonaqtar qatysty. Qazaq sport jáne týrızm akademıasynyń 80 jyldyǵyna arnalǵan barlyq is-sharalar óte joǵary deńgeıde uıymdastyryldy.
Sondaı-aq 80 jyldyq qarsańynda Qazaq sport jáne týrızm akademıasynyń ǵımaratynda kúres zaly ashyldy. Myń sharshy metr aýmaqty alyp jatqan zalǵa tórt bozkilem qatar syıady. Keń keshende qazaq kúresi, erkin kúres, grek-rım, dzúdo, sambo sekildi sport túrlerimen aınalysýǵa bolady. Sonymen qatar, kúnine aýysymmen 700-ge jýyq adam jattyǵýǵa múmkindik bar, deıdi bapkerler. Qurylys jumystary akademıanyń óz qarajatyna júrgizildi.
80 jylda akademıadan 80-nen astam olımpıada júldegerleri men 200 den astam álem chempıondary shyqty. Sondyqtan oqý ordasyn qazaq sportynyń ustahanasy deýge tolyq negiz bar.
Aıta keteıik, 1944 jyly 14 qarashada Orta Azıadaǵy alǵashqy sportshylar men bapkerlerdi daıyndaıtyn Qazaq memlekettik dene tárbıesi ınstıtýty quryldy. Bul joǵary oqý orny Orta Azıa aımaǵynda birinshi bolǵandyqtan, ózbek, qyrǵyz, túrikmen jáne tájik odaqtas respýblıkalar úshin de dene shynyqtyrý-sport kadrlaryn daıarlaýdy júzege asyrdy.
1998 jyly 28 qazanda Qazaq memlekettik dene tárbıesi mádenıeti ınstıtýty Qazaq sport jáne týrızm akademıasy mártebesine ıe boldy. Qaırat Qaırollauly Zakıránov basshylyq etetin bul oqý ornynyń elimizde alatyn orny erekshe. Akademıa quramynda 3 fakúltet, 11 kafedra, 2 ǵylymı-zertteý ınstıtýty men 2 stadıon, 1 baseın, 3 sporttyq-tehnıkalyq baza, 2 stýdentter jataqhanasy, 1 Olımpıada dańq murajaıy men kitaphana bar. 150-ge jýyq profesor, doktorlar, ǵylym kandıdattary men bilikti oqytýshylar eńbek etedi. Akademıada qazir 4000-ǵa jýyq stýdent bilim alýda. Sondaı-aq zamanaýı bilim baǵdarlamalaryn júzege asyrý maqsatynda kóptegen halyqaralyq joǵarǵy oqý oryndarymen tyǵyz baılanys ornaǵan.
