8 naýryz merekesi qarsańynda alaiaqtar azamattardyń gúl men syilyqqa tapsyrys berý belsendiligin paidalanyp, túrli ailamen aqsha men jeke derekterdi iemdenýge tyrysýda, dep habarlaidy Dala news.
Bas prokýratýranyń málimetinshe, mereke kúnderi alaiaqtar azamattarǵa qońyraý shalyp nemese habarlama jiberip, ártúrli syltaýmen SMS-kodty aitýdy suraidy.
Eń jii kezdesetin alaiaqtyq shemalar:
•gúl nemese syilyq jetkizý rásimdelgeni týraly habarlap, «tapsyrysty rastaý úshin» SMS-kod suraý
•jalǵan utys, bonýs nemese aktsiia týraly aityp, telefonǵa kelgen rastaý kodyn talap etý
•ózin bank qyzmetkeri, qaýipsizdik qyzmeti nemese kýrerlik kompaniia ókili retinde tanystyrý.
Mamandardyń aitýynsha, bir rettik SMS-kod – qarjylyq operatsiialardy rastaýǵa arnalǵan qupiia derek. Mundai kodty úshinshi tulǵalarǵa berý banktik shottan aqsha sheship alýǵa, nesie rásimdeýge nemese mobildi bankingke qol jetkizýge múmkindik berýi múmkin.
Prokýratýra bank qyzmetkerleri de, quqyq qorǵaý organdary da eshqashan telefon arqyly SMS-kod, parol nemese bank kartasynyń derekterin suramaitynyn eskertedi.
Sondai-aq mereke qarsańynda alaiaqtar Instagram men TikTok jelilerinde jalǵan dúkender ashyp, gúl men syilyqtardy óte arzan baǵamen usynyp, aldyn ala tólem talap etedi. Aqsha aýdarylǵannan keiin mundai paraqshalar joǵalyp ketedi.
Azamattarǵa gúl men syilyqtardy tek senimdi satýshylardan satyp alyp, kúmándi siltemelerge ótpeý, tólem aldynda rekvizitterdi muqiiat tekserý jáne eshqashan SMS-kod pen bank derekterin bógde adamdarǵa bermeý usynylady.
Kúmán týyndaǵan jaǵdaida bankke resmi nómir arqyly habarlasyp, qajet bolsa quqyq qorǵaý organdaryna júginý kerek.
