Shymkent qalasynyń burynǵy sýdiasy Janat Músiráli 7,5 jylǵa bas bostandyǵynan aiyryldy. Oǵan "ádiletsiz sheshim shyǵarý úshin" para aldy degen aiyp taǵylǵan. Bul oqiǵa birqatar azamattyń onyń shyǵarǵan sheshimderin qaita qaraýdy talap etýine túrtki boldy, dep habarlaidy Dalanews.kz.
Jýrnalist Juldyz Tóleý áleýmettik jelidegi jazbasynda dál osy sýdianyń 77 jastaǵy anasynyń úiine qatysty ádiletsiz sheshim shyǵarǵanyn málimdedi. Onyń sózinshe, Músiráli anasynyń zańdy múlkin úshinshi bir tulǵalardyń paidasyna sheship bergen.
"Mynaý sýrettegi Shymkent qalasynyń sýdiasy Janat Músiráli alaiaqtyq babymen 7,5 jylǵa sottalypty. Dál osy sýdia edi anamnyń kóz jasyn sorǵalatyp, mańdai termen salynǵan úiin alaiaqtarǵa sheship bergen. Endi ózi alaiaqtyq babymen sottalyp otyr. Sottalýshynyń jazasyn jeńildetý úshin 110 mln teńge alǵan deidi. Mundai ashkóz sýdialardyń qara halyqta qandai isi bolsyn!!! Sol sebepten bul shyǵarǵan sheshimniń bárin qaita qaraý kerek dep esepteimin", – dep jazdy ol.
Aryz iesiniń aitýynsha, 2021 jyly Iýrii Kakýlidi esimdi azamat anasynyń senimine kirip, jyljymaityn múlikti kepilge qoiý úshin birneshe kúnge rásimdeý keregin aitqan. Biraq shyn máninde, notariýs arqyly úidi basqa bireýdiń atyna aýdaryp jibergen. Bul iske taǵy birneshe azamat qatysqanymen, quqyq qorǵaý organdary isti úsh jyl boiy tergep, keiin jaýyp tastaǵan.
2024 jyly sot alǵashqy instantsiiada zeinetkerdiń paidasyna sheshim shyǵarǵanymen, keiin apelliatsiialyq sot ony keri qaitaryp, múlikti jańa iesiniń enshisinde qaldyrǵan. Endi jýrnalist Juldyz Tóleý bul isti Joǵarǵy sottyń qaita qaraýyn talap etýde.
Eske salsaq, sýdia Janat Músiráli para alý jáne alaiaqtyq qylmysy boiynsha kináli dep tanylyp, 7 jyl 6 aiǵa sottaldy. Sottalýshylardyń biri zańger bolsa, ekinshisi deldal retinde áreket etken. Olar jábirlenýshini aldap, 110 million teńgesin iemdengen.
Qoǵam belsendileri men zańgerler eks-sýdianyń barlyq sheshimi qaita qaralýy kerek dep esepteidi. Qazirgi tańda bul máselege bailanysty Joǵarǵy sot pen quzyrly organdarǵa shaǵym túsirildi.
