"7-20-25" ipotekalyq baǵdarlamasynyń sharttaryna ózgerister engizildi, dep habarlaidy Dalanews.kz.
Ulttyq bank málimetinshe, "7-20-25" jeńildetilgen ipotekalyq turǵyn úi nesieleý baǵdarlamasyn bekitý týraly qaýlyǵa ózgerister men tolyqtyrýlar engizildi. Bul ózgerister 2025 jylǵy 26 qyrkúiektegi №59 basqarma qaýlysymen qabyldanǵan.
Qaýlyǵa sáikes, satyp alynatyn turǵyn úidiń eń joǵary quny tómendegidei bolyp artty:
– Astana, Almaty jáne olardyń irgeles aimaqtarynda, sondai-aq Aqtaý, Atyraý, Shymkent qalalarynda — 25 million teńgeden 30 million teńgege deiin;
– Qaraǵandy qalasynda — 20 millionnan 25 million teńgege deiin;
– ózge óńirlerde — 15 millionnan 20 million teńgege deiin.
Sonymen qatar endi qaryz alýshylar ózderiniń tólem qabilettiligin rastaý úshin birlesken qaryz alýshylarmen qatar, kepilgerdi de tartýǵa múmkindik alady.
Qujatta nesie ótinimin qarastyrý kezinde qaryz alýshynyń tabysynyń úzdiksizdigi mańyzdy sharttardyń biri retinde kórsetilgen.
"Atalǵan ózgeristerdiń basty maqsaty – turǵyn úidiń qoljetimdiligin keńeitý, ipotekalyq nesie alý sharttaryn ikemdi ári tiimdi etý. Baǵdarlama sheńberindegi ózge talaptar men parametrler ózgerissiz qalady", – dep atap ótti Ulttyq bank.
Eske sala ketsek, "7-20-25" baǵdarlamasy 2018 jyly halyqqa jyldyq 7 paiyz mólsherlememen, alǵashqy jarnasy 20 paiyzdan bastap, 25 jylǵa deiingi merzimge qoljetimdi ipoteka usyný maqsatynda iske qosylǵan bolatyn.
