"7-20-25" يپوتەكالىق باعدارلاماسىنىڭ شارتتارىنا وزگەرىستەر ەنگىزىلدى، دەپ حابارلايدى Dalanews.kz.
ۇلتتىق بانك مالىمەتىنشە، "7-20-25" جەڭىلدەتىلگەن يپوتەكالىق تۇرعىن ءۇي نەسيەلەۋ باعدارلاماسىن بەكىتۋ تۋرالى قاۋلىعا وزگەرىستەر مەن تولىقتىرۋلار ەنگىزىلدى. بۇل وزگەرىستەر 2025 جىلعى 26 قىركۇيەكتەگى №59 باسقارما قاۋلىسىمەن قابىلدانعان.
قاۋلىعا سايكەس، ساتىپ الىناتىن تۇرعىن ءۇيدىڭ ەڭ جوعارى قۇنى تومەندەگىدەي بولىپ ارتتى:
– استانا، الماتى جانە ولاردىڭ ىرگەلەس ايماقتارىندا، سونداي-اق اقتاۋ، اتىراۋ، شىمكەنت قالالارىندا — 25 ميلليون تەڭگەدەن 30 ميلليون تەڭگەگە دەيىن؛
– قاراعاندى قالاسىندا — 20 ميلليوننان 25 ميلليون تەڭگەگە دەيىن؛
– وزگە وڭىرلەردە — 15 ميلليوننان 20 ميلليون تەڭگەگە دەيىن.
سونىمەن قاتار ەندى قارىز الۋشىلار وزدەرىنىڭ تولەم قابىلەتتىلىگىن راستاۋ ءۇشىن بىرلەسكەن قارىز الۋشىلارمەن قاتار، كەپىلگەردى دە تارتۋعا مۇمكىندىك الادى.
قۇجاتتا نەسيە ءوتىنىمىن قاراستىرۋ كەزىندە قارىز الۋشىنىڭ تابىسىنىڭ ۇزدىكسىزدىگى ماڭىزدى شارتتاردىڭ ءبىرى رەتىندە كورسەتىلگەن.
"اتالعان وزگەرىستەردىڭ باستى ماقساتى – تۇرعىن ءۇيدىڭ قولجەتىمدىلىگىن كەڭەيتۋ، يپوتەكالىق نەسيە الۋ شارتتارىن يكەمدى ءارى ءتيىمدى ەتۋ. باعدارلاما شەڭبەرىندەگى وزگە تالاپتار مەن پارامەترلەر وزگەرىسسىز قالادى"، – دەپ اتاپ ءوتتى ۇلتتىق بانك.
ەسكە سالا كەتسەك، "7-20-25" باعدارلاماسى 2018 جىلى حالىققا جىلدىق 7 پايىز مولشەرلەمەمەن، العاشقى جارناسى 20 پايىزدان باستاپ، 25 جىلعا دەيىنگى مەرزىمگە قولجەتىمدى يپوتەكا ۇسىنۋ ماقساتىندا ىسكە قوسىلعان بولاتىن.
