Aqtóbede "Tý-Ha" munai tehnologiialyq qyzmet kórsetý kompaniiasy JShS direktorynyń orynbasary, bas býhgalteri jáne olardyń birneshe kómekshisine qatysty 6 mlrd teńgeden astam qarjyny urlaý isi boiynsha úkim shyqty, dep habarlaidy Dalanews.kz.
"Aqtóbe qalasynyń №2 sotynda "Tý-Ha" JShS-nyń direktordyń orynbasary men bas býhgalteri jáne olardyń úsh kómekshisine qatysty qylmystyq is qaraldy. Memlekettik aiyptaýshy tarap sotqa 189-bap (senip tapsyrylǵan bóten múlikti iemdený nemese talan-tarajǵa salý) jáne 218-bap (qylmystyq jolmen alynǵan aqsha men múlikti zańdastyrý) boiynsha aiyp taqty. Is materialdaryna sáikes, tergeý barysynda aiyptalýshylar 2007-2021 jyldar aralyǵynda 6 mlrd 116 mln 310 myń 603 teńge kóleminde qarjyny urlaǵany anyqtaldy", – delingen Bas prokýratýranyń habarlamasynda.
Is materialdaryna qaraǵanda, urlanǵan qarjyǵa aiyptalýshylar ártúrli qaladan 16 páter, 8 jer ýchaskesin, Aqtóbede «Iýrta Park» jáne «Printsessa Sabina» balalar oiyn-saýyq keshenin qosa alǵanda 3 oiyn-saýyq nysanyn, sondai-aq 4 biznes-klassty avtokólikti jáne qolma-qol aqshany satyp alǵan.
Sot aiyptalýshylardyń kinásin tolyq dáleldengen dep tanyp, úsheýin jetiden segiz jylǵa deiin bas bostandyǵynan aiyrdy. Solardyń birin sot zalynda tikelei qamaýǵa aldy.
Sonymen birge Bas prokýratýra málimetinshe, keibir BAQ-ta 2007-2021 jyldary aiyptalýshylardyń sheneýnikterge para berip, sotqa qysym jasaý áreketteri týraly aqparat taraǵan. Bul málimdemeler sot pen prokýratýra tarapynan muqiiat tekserilip, zańdy baǵa berilgen. Úkimde sot mundai málimdemelerdi jaýapkershilikten jaltarýdyń áreketi retinde qarastyratyny atap ótilgen.
"Osyǵan bailanysty, sottalmaǵan faktilerdi eskermei jariialanǵan materialdar sottyń ádil sheshim qabyldaýyna kedergi keltirýi múmkin. Sol sebepten azamattardy tek resmi derekkózderge senýge shaqyramyz", – dep atap ótti vedomstvo.
