اقتوبەدە "تۋ-حا" مۇناي تەحنولوگيالىق قىزمەت كورسەتۋ كومپانياسى ج ش س ديرەكتورىنىڭ ورىنباسارى، باس بۋحگالتەرى جانە ولاردىڭ بىرنەشە كومەكشىسىنە قاتىستى 6 ملرد تەڭگەدەن استام قارجىنى ۇرلاۋ ءىسى بويىنشا ۇكىم شىقتى، دەپ حابارلايدى Dalanews.kz.
"اقتوبە قالاسىنىڭ №2 سوتىندا "تۋ-حا" جشس-نىڭ ديرەكتوردىڭ ورىنباسارى مەن باس بۋحگالتەرى جانە ولاردىڭ ءۇش كومەكشىسىنە قاتىستى قىلمىستىق ءىس قارالدى. مەملەكەتتىك ايىپتاۋشى تاراپ سوتقا 189-باپ (سەنىپ تاپسىرىلعان بوتەن مۇلىكتى يەمدەنۋ نەمەسە تالان-تاراجعا سالۋ) جانە 218-باپ (قىلمىستىق جولمەن الىنعان اقشا مەن مۇلىكتى زاڭداستىرۋ) بويىنشا ايىپ تاقتى. ءىس ماتەريالدارىنا سايكەس، تەرگەۋ بارىسىندا ايىپتالۋشىلار 2007-2021 جىلدار ارالىعىندا 6 ملرد 116 ملن 310 مىڭ 603 تەڭگە كولەمىندە قارجىنى ۇرلاعانى انىقتالدى"، – دەلىنگەن باس پروكۋراتۋرانىڭ حابارلاماسىندا.
ءىس ماتەريالدارىنا قاراعاندا، ۇرلانعان قارجىعا ايىپتالۋشىلار ءارتۇرلى قالادان 16 پاتەر، 8 جەر ۋچاسكەسىن، اقتوبەدە «يۋرتا پارك» جانە «پرينسەسسا سابينا» بالالار ويىن-ساۋىق كەشەنىن قوسا العاندا 3 ويىن-ساۋىق نىسانىن، سونداي-اق 4 بيزنەس-كلاسستى اۆتوكولىكتى جانە قولما-قول اقشانى ساتىپ العان.
سوت ايىپتالۋشىلاردىڭ كىناسىن تولىق دالەلدەنگەن دەپ تانىپ، ۇشەۋىن جەتىدەن سەگىز جىلعا دەيىن باس بوستاندىعىنان ايىردى. سولاردىڭ ءبىرىن سوت زالىندا تىكەلەي قاماۋعا الدى.
سونىمەن بىرگە باس پروكۋراتۋرا مالىمەتىنشە، كەيبىر باق-تا 2007-2021 جىلدارى ايىپتالۋشىلاردىڭ شەنەۋنىكتەرگە پارا بەرىپ، سوتقا قىسىم جاساۋ ارەكەتتەرى تۋرالى اقپارات تاراعان. بۇل مالىمدەمەلەر سوت پەن پروكۋراتۋرا تاراپىنان مۇقيات تەكسەرىلىپ، زاڭدى باعا بەرىلگەن. ۇكىمدە سوت مۇنداي مالىمدەمەلەردى جاۋاپكەرشىلىكتەن جالتارۋدىڭ ارەكەتى رەتىندە قاراستىراتىنى اتاپ وتىلگەن.
"وسىعان بايلانىستى، سوتتالماعان فاكتىلەردى ەسكەرمەي جاريالانعان ماتەريالدار سوتتىڭ ءادىل شەشىم قابىلداۋىنا كەدەرگى كەلتىرۋى مۇمكىن. سول سەبەپتەن ازاماتتاردى تەك رەسمي دەرەككوزدەرگە سەنۋگە شاقىرامىز"، – دەپ اتاپ ءوتتى ۆەدومستۆو.
