Kásipqoi boksshy Janqosh Turarov zorlady dep málimdeme jasaǵan Ánarý Qaldybekqyzy sportshymen qalai tanys ekenin jáne istiń mán-jaiyn aitty, - dep habarlaidy Dalanews.kz Azattyq Ruhy saityna silteme jasap.
Ánarýdyń aitýynsha, ol Janqosh Turarovpen 2018 jyly áleýmettik jeli arqyly tanysqan.
«2018 jyly «VKontakte» áleýmettik jelisi arqyly maǵan ózi birinshi hat jazdy. Meniń sýretterimen lúpil basyp, únemi hat jazyp júrdi. Men ol kezde onyń úilengenin, bala-shaǵasy bar ekenin bilgen joqpyn, boksshy ekenin de bilgen joqpyn. Áleýmettik jelide otbasy týraly eshbir aqparat jazbaǵan. Boidaqpyn dep statýs qoiǵan. Sodan keiin jai ǵana sóilesip júrdim. 2018 jyldyń aqpan aiynda meni kezdesýge shaqyrdy. Ondai jerge jalǵyz barmaityn bolǵan soń qurbymdy ertip aldym. Grýppalas qurbym ekeýmiz kezdesýge bardyq, al onyń janynda kóp adam boldy. Sodan bastap bir ai boiy maǵan hat jazyp júrdi. Maǵan «sen pák qyzsyń, sen taza qyzsyń, maǵan qatty unaisyń» deitin. Biraq, ol kezde men onyń otbasyly adam ekenin bilip, «siz úilengen adam ekensiz, men sizben aralasa almaimyn» dedim. «Joq, men úilengen bolsam da sen maǵan unaisyń, men saǵan aǵalyq qamqorlyq tanytqym keledi, jamandyq oilamaimyn» dedi. Osylai kúnde hat jazatyn. Arada bir ai ótkende maǵan «ákemniń anasy, ájem qatty aýyryp jatyr. Hál ústinde. Seni kórsetkim keledi, kelshi» dep bir meken-jai jiberdi. Men birden bara almaimyn dedim. Biraq, sonyń aldynda, bir jarym jyl buryn men anamnan aiyrylǵan adam retinde onyń ájesi aýyryp qalǵanyna qatty janym ashydy. Sondyqtan, ol meni apasynyń hálin suraýǵa kóndirdi», - deidi Ánarý Qaldybekqyzy.
Ánarýdyń aitýynsha, Janqosh Turarov oǵan «apam osy jerde» dep bir meken-jai jibergen. Barǵanda onyń qonaq úi ekenin kórgen.
«Ol maǵan qonaq úidiń meken jaiyn jiberipti. «Qazybek» degen qonaq úidiń 4 qabaty, 404 nómirin alypty. Men ol kezde stýdent edim, jas edim, men qonaq úidiń ne ekenin bilmeitinmin. Kirsem, ózi ǵana otyr eken nómirde. «Apańyz qaida?» dep edim, «qazir keledi» dedi. Sosyn maǵan syrttan keldiń ǵoi, shóldegen shyǵarsyń, sý ish» dep bótelkedegi sýdan quiyp berdi. Ishkennen keiin basym ainalyp, esimnen tanǵandai bolyp, júre almai qaldym. Aiaqtarym qozǵalmai qaldy. «Júr, júr» dep tósek jaqqa qarai aparyp, tósekke jatqyzdy. «Basyń ainalyp ketti, jata tur» dedi. Esimdi jartylai bilemin, jartylai bilmeimin. Sanam anyq emes, sol ýaqytta meni aqyryndap jatqyzyp, kiimderimniń bárin sheshti. Ústimde kóilegim bolǵan, kóilegimdi sheshti. Aiaǵymnan, tabanymnan, aiaǵymnyń bashpailaryn súie bastady. Men qozǵala almai jattym. Oianǵanda eshteme túsinbedim. Esimdi jisam, saǵat túngi 3-4 bolypty», - deidi ol.
Iaǵni, Ánarýdyń aitýynsha, Janqosh Turarov onyń páktigin alyp, alǵash ret ony sol qonaq úide erkinen tys jynystyq qatynasqa tartqan.
«Sol túni ol birinshi ret «isin» istedi. Odan keiin ol dýshqa kirip ketti, telefonyna «Botaqan» degen bir bailanys nómiri qaita-qaita bireý qońyraý shaldy. Janqosh dýshtan shyqty. «Zorladyń ba?» degende maǵan «joq, óziń keldiń, meni bári qyzdar jaqsy kóredi ǵoi» dedi. Men «joq, sizdiń ústińizden aryz jazamyn» dedim. Sol sátte basqasha sóilep, «men áielimmen ajyrasaiyn dep júrmin, ony jaqsy kórmeimin, maǵan ul bala kerek, saǵan degen sezimim bar, seni jaqsy kóremin» dedi. Men onyń sol sózderine sendim», - deidi Ánarý Qaldybekqyzy.
Onyń aitýynsha, Janqosh Turarov sol qalpy áielinen ajyraspaǵan. Biraq, aitýynsha, qyzdy da jaiyna qaldyrmaǵan.
«Oǵan «áielińiz bar ǵoi, ar-namysyńyz qalai jiberedi, namaz oqisyz, Mekkege bardyńyz, qyzdaryńyz bar, nege maǵan bulai istedińiz» desem, «men seni jaqsy kóremin» deidi», - dedi ol.
Osylaisha, Ánarýdyń aitýynsha, Janqosh Turarov onyń qyr sońynan qalmaityn bolǵan.
«Men Almatydaǵy jaǵdaidyń bárin umytaiynshy, jańa ómir bastaiynshy dep, Aqtaýǵa kettim. Ol artymnan Aqtaýǵa keldi. Astanaǵa barsam, Astanaǵa keledi. Alty jyl boiy meniń búkil jastyǵymdy, qyzdyǵymdy, páktigimdi qurtty», - deidi ol.
Ánarý Qaldybekqyzy 2018 jyldan beri osy ýaqytqa deiin Janqosh Turarov ekeýi únemi tósek qatynasyna túsip júrgenin málim etti. Al, sońǵy ret, onyń aitýynsha, Janqosh ony kúshpen jynystyq qatynasqa túsirgen.
«Eń alǵash qyzdyǵymdy alǵannan keiin 20 kún boiy kindik sheshemniń úiinde turdym. Sol kisi kýá ǵoi: bir apta tósek tartyp jatyp, 20 kún boiy úiden shyqpadym. Ózimdi kináladym, ókindim. Qatty kúizeldim», - deidi ol.
Ánarýdyń aitýynsha, sońǵy ret Janqosh ekeýi 2024 jyldyń 12 tamyzynda kezdesken.
«Sońǵy ret men Almatyda ekenimdi bilip alyp, maǵan kelemin dedi. «Sálem, qalaisyń, men seni saǵyndym» dep hat jazdy. «Kórgim kelip tur» dep adres surady. Men kezdesýge qarsy boldym. Ol maǵan «men áielimmen ajyrasamyn, ara qatynasymyz óte nashar, úsh qyz týdy, bir ul týyp bere almady. Sendei adamnan, sendei qyzdan urpaq bolǵanyn qalaimyn» dedi. Sosyn, meken- jaiymdy jibergen soń, 12 tamyz kúni túnde keldi. Meniń oiym – oǵan jandúniemde ne bolyp jatqanyn aitý edi. Anam týraly aityp, júregimdi aqtarǵym keldi. Anama shyǵarǵan óleńimdi oqydym. Sol kúni oǵan «ómirimdi qurttyń» dep jyladym. «Jeti jyldai boldy sizge senip júrgenime, qanshama adam úileneiik dep usynys aitty, eshkimge qaramadym, sen meniń júregime óte qatty daq saldyń» dedim. Biraq, ol tyńdamai, meni sheshindirmekshi boldy. Men qarsy boldym, «Janqosh, sóilesýge keldik qoi» dedim. «Jaǵdaidy aitqym keledi» dedim. Qarsylastym. Ol óz degeninde turyp, jynystyq qatynasqa tústi. Meni kúshpen qylqyndyryp, moinymnan ustap turyp, shashymnan tartyp, zorlady. Bárin bolǵannan keiin janymda otyrdy. Maǵan «ajyrasamyn» dep taǵy sendirip ketti», - deidi Ánarý.
Arada alty kún ótken soń emotsionaldy túrde sharshadym degen Ánarý aqyry politsiiaǵa aryz jazýǵa bekingen.
«Zorlap jatqanda aiqalaidym. «Tiispe» dedim. Osydan sharshaǵan soń, tamyzdyń 19-kúni politsiiany shaqyrdym. Oǵan deiin men depressiiada júrdim. Nege aryz jazdym deseńizder, sebebi men sharshadym, jeti jyldan beri ómirim ótip jatyr. Qyzdyǵymdy alǵany týraly, anama bergen sertim týraly oiyma kele berdi. Emotsionaldy kúide boldym. Osylaisha Áýezov politsiiasyna baryp, aryz jazdym. Politsiiada bettestirý ótti. 20 tamyzda bettestik. Bettestirý kezinde maǵan «Alla razylyǵy úshin meni keshirshi, men seni unattym, saǵan degen sezimim bar, men seni eshqashan tastamaimyn, máńgilikke birge bolamyz» dedi. «Men saǵan istegenim úshin bárine jaýap beremin, bárine kómek beremin. Saǵan 2 mln teńge jibereiin» dedi. Men «aqsha da, eshteńe de kerek emes, psihologiialyq jaǵdaiym durys, balalyq shaǵym baqytty ótti, maǵan anamnyń ólimi men sizdiń maǵan istegenińiz jara saldy» dedim. Endi isti politsiia tergep jatyr», - dedi ol.
Ánarýdyń aitýynsha, onyń bar talaby Janqosh Turarovty zań aiasynda jazalaý.
«Óz jazasyn alsa eken deimin. Saraptamanyń bárin jasattym. Iaǵni, Turarov Janqoshtyń jazalanyp, qolymen istegenin moinymen kótersin deimin. Alty jarym jyl buryn qandai adam edi, dál qazir sondai adam. Qazir aityp turǵanymnyń bári shyn, barlyq dálelim bar. Jazbalar bar, kýágerler bar», - deidi Ánarý Qurmanáli.
