1 shildeden bastap eńbek demalysyna shyqqan aqtóbelik muǵalimder osy ýaqytqa deiin tiisti qarajattaryn ala almai júrgenderin aityp shaǵymdandy, dep habarlaidy dalanews.kz "Diapazon" basylymyna silteme jasap.
"1 shildeden bastap mektep pedagogteri zańdy jyldyq eńbek demalysyna shyqty. Biraq kóbisi demalys aqysyn áli alǵan joq. Bizge "aqsha joq" dep aitady. Pedagogter úshin demalys - sán-saltanat nemese qosymsha artyqshylyq emes, zańmen kepildendirilgen quqyq. Demalys aqysy muǵalimderge azyq-túlik, kommýnaldyq qyzmetter, emdelý jáne týystaryna barý siiaqty negizgi ómirlik qajettilikterin óteýge múmkindik beredi. Tólemder bolmasa, demalys kúsh jinaityn ýaqytqa emes, ýaiym men belgisizdik kezeńine ainalady", - delingen muǵalimderdiń gazet redaktsiiasyna joldaǵan hatynda.
Bilim basqarmasy demalys aqysy demalys bastalǵanǵa deiin keminde úsh kún buryn tólenýi tiis ekenin rastady.
"Biraq bul bizge emes, biýdjettiń kiris bóliginiń túsýine bailanysty. Biz keste qurdyq, 1-10 shilde aralyǵynda demalysqa shyqqandarǵa aqshany kezeń-kezeńimen tóleýge daiynbyz, biraq bul tek biýdjetten qarajat túsken kezde ǵana júzege asady", - dep jaýap berdi bilim basqarmasy basshysynyń orynbasary Aqkenje Tyndybaeva.
Sondai-aq, ol 1 maýsymnan bastap demalysqa shyqqandardyń jalaqysy men demalys aqysyn tolyq alǵanyn atap ótti.
"Shilde aiynyń tólemderin kútip otyrmyz. Suratylǵan soma shamamen 5 mlrd teńgeni quraidy", - dedi bilim basqarmasy basshysynyń orynbasary.
Basqarma muǵalimderdiń demalys aqysy 10 shildege deiin túsedi dep ýáde berdi.
