Taldyqorǵan sotynda 4,6 milliard teńge jymqyrǵany úshin aiyptalǵan 20 býhgalterdiń isine qatysty apelliatsiia qaraldy, - dep habarlaidy Dalanews.kz Orda.kz-ke siltep.
Aiyptaý aktinde birneshe býhgalter qylmystyq shema uiymdastyrǵany aitylǵan: olar birneshe jyl boiy shyn máninde jumys istemeitin qyzmetkerlerdi tirkep, olardyń jalaqysyn qaltasyna basyp otyrǵan.
Prokýrorlardyń sózinshe, qylmystyq shema egjei-tegjeili uiymdastyrylǵan, osylaisha býhgalterler biýdjettiń 4,6 milliard teńgesin qaltasyna basqan.
Birinshi instantsiiadaǵy sot sheshimi boiynsha kináli tulǵalar 7-15 jyl aralyǵyna deiin sottaldy. Alaida qorǵaýshylardyń sózinshe, tergeý barysynda birneshe zańbuzýshylyq jasalǵan. Búgin apelliatsiialyq protsess bastaldy. Onda aiyptalýshylar istiń qaitadan qaralýyn talap etti.
"Biz qylmystyq top emespiz, biz - qarapaiym qyzmetkerlermiz. Tergeý kezinde zańbuzýshylyqtar jasaldy, kóptegen derek eleýsiz qaldy", - deidi aiyptalýshylar.
Sotta advokattar men aiyptalýshylar sóiledi. Olardyń biriniń jazasyn jeńildetý suraldy, sebebi aiyptalýshynyń emizýli balasy bar eken. Qazir ol anasymen birge tergeý izoliatorynda otyr. Býhgalterlerdiń qorǵaýshylary olardyń 63 million teńgeni qaitarǵanyn eskerýdi de suraǵan.
"Olar tek bir shynjyrdyń túiini, naǵyz kináli adamdar olardan áldeqaida joǵary qyzmette otyr. Olar jaýapkershilikten qashyp úlgerdi", - deidi advokattar.
Taǵy bir býhgalterdiń jazasyn jeńildetý suralǵan: ol onkologiiamen aýyratyn bolyp shyqqan. Ol 28 million teńge zalaldy ótepti.
Býhgalterler birlesip áreketti etti me, álde árkim jeke dara áreket etti me - ony sot anyqtaidy. Aiyptalýshylar iri qylmystyq shemanyń múshesi de bolýy múmkin.
Eske salaiyq, 20 býhgalterge qatysty sheshim biyl shildede shyqqan bolatyn. Qalalyq bilim bóliminiń burynǵy bas býhgalteri Madlen Sergazinova alaiaqtyq qylmystary úshin jáne qylmystyq top qurǵany úshin kináli dep tanyldy. Oǵan 15 jyl bas bostandyǵynan aiyrý jazasy taǵaiyndaldy. Sergazinova ótken jyldyń kókteminde Panfilov aýdanynda 2,5 milliard teńge urlamaq bolǵan jerinen ustaldy. Tergeý barysynda odan 14 páter, 7 kommertsiialyq nysan, 21 jyljymaityn múlik jáne Land Cruiser avtokóligi tabyldy.
Sondai-aq, Sergazinovanyń orynbasary, ortalyq apparattyń eki qyzmetkeri jáne ekonomist ustaldy. Jalpy urlanǵan qarjy mólsheri 4,6 milliard teńge. Sot nátijesinde 15 býhgalter 7-13 jyl aralyǵynda bas bostandyǵynan aiyryldy.
