42 500 teńgege ótinish berýde bul joly bir ózgeshelik bar - Nurymbetov
Biraq bul joly ótinishti azamattardyń ózi emes, jumys berýshiler beredi. Bul týraly ortalyq kommýnikatsiialar qyzmetindegi brifingte eńbek jáne halyqty áleýmettik qorǵaý ministri Birjan Nurymbetov habarlady.
Ministrdiń aitýynsha, aldaǵy eki kúnde áleýmettik járdemaqyny tóleýdiń mehanizmderi pysyqtalady. Nurymbetov bári oidaǵydai bolsa, beisenbi, 16 shilde kúni járdemaqyny taǵaiyndaý erejesi jariialanatynyn, azamattar 17 shilde, jumadan bastap ótinish bere alatynyn aitty. Qujattar dúisenbi, 20 shildeden bastap qaralady.
Bul joly járdemaqy alý úshin áleýmettik tólem (Biryńǵai jinaq tólem, jeke kásipker retinde salyq) tóleý mindetti emes.
“42 500 teńge tótenshe jaǵdai kezindegi ereje boiynsha tabysynan aiyrylǵan azamattarǵa, onyń ishinde, jaldamaly qyzmetkerler men ózin-ózi jumyspen qamtyǵan azamattarǵa beriledi” dedi ministr.
Nurymbetov eń tómengi jalaqy sanalatyn 42 500 teńgeniń az qarajat ekenin moiyndady.
"Bul kómekti kóbeitsek degen jospar bolǵan joq. Sheshim keshe ǵana qabyldandy (13 shilde). Bul endi áleýmettik tólemniń minimaldy kólemi. 42 500 barlyq shyǵyndy jabady demeimiz. Qazirgidei almaǵaiyp ýaqytta halyqtyń aqshasy azyq-túlikten bólek, dári-dármekke jumsalyp jatyr. Muny pandemiia kezinde tabystan qaǵylǵan azamattar úshin memleketten kórsetilgen kishigirim kómek esebinde qabyldaý qajet", – deidi Eńbekmin basshysy.
2 shilde kúni Qazaqstanda ekinshi ret karantin shekteýleri engiziletini belgili bolǵanda, vitse-premer Eraly Toǵjanov “[42500 teńge] tótenshe jaǵdai rejimimen bailanysty boldy. Tótenshe jaǵdai rejimi toqtatyldy, endi ony tóleýge eshqandai negiz joq” degen bolatyn.
Bastapqyda 5 shildeden bastap eki aptaǵa sozylatyn karantin 14 shilde kúni 2 tamyzǵa deiin uzartylyp, tolyq bir aidy qamtityn boldy.
Karantinniń uzartylatynyn jariia etken premer-ministr Asqar Mamin tótenshe jaǵdai jariialanbasa da, shekteýge bailanysty qyzmeti shektelgen azamattarǵa 42 500 teńge kólemindegi bir rettik kómek beriletinin aitty.
