ءبىراق بۇل جولى ءوتىنىشتى ازاماتتاردىڭ ءوزى ەمەس، جۇمىس بەرۋشىلەر بەرەدى. بۇل تۋرالى ورتالىق كوممۋنيكاسيالار قىزمەتىندەگى بريفينگتە ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ حابارلادى.
ءمينيستردىڭ ايتۋىنشا، الداعى ەكى كۇندە الەۋمەتتىك جاردەماقىنى تولەۋدىڭ مەحانيزمدەرى پىسىقتالادى. نۇرىمبەتوۆ ءبارى ويداعىداي بولسا، بەيسەنبى، 16 شىلدە كۇنى جاردەماقىنى تاعايىنداۋ ەرەجەسى جاريالاناتىنىن، ازاماتتار 17 شىلدە، جۇمادان باستاپ ءوتىنىش بەرە الاتىنىن ايتتى. قۇجاتتار دۇيسەنبى، 20 شىلدەدەن باستاپ قارالادى.
بۇل جولى جاردەماقى الۋ ءۇشىن الەۋمەتتىك تولەم (ءبىرىڭعاي جيناق تولەم، جەكە كاسىپكەر رەتىندە سالىق) تولەۋ مىندەتتى ەمەس.
“42 500 تەڭگە توتەنشە جاعداي كەزىندەگى ەرەجە بويىنشا تابىسىنان ايىرىلعان ازاماتتارعا، ونىڭ ىشىندە، جالدامالى قىزمەتكەرلەر مەن ءوزىن-وزى جۇمىسپەن قامتىعان ازاماتتارعا بەرىلەدى” دەدى مينيستر.
نۇرىمبەتوۆ ەڭ تومەنگى جالاقى سانالاتىن 42 500 تەڭگەنىڭ از قاراجات ەكەنىن مويىندادى.
"بۇل كومەكتى كوبەيتسەك دەگەن جوسپار بولعان جوق. شەشىم كەشە عانا قابىلداندى (13 شىلدە). بۇل ەندى الەۋمەتتىك تولەمنىڭ مينيمالدى كولەمى. 42 500 بارلىق شىعىندى جابادى دەمەيمىز. قازىرگىدەي الماعايىپ ۋاقىتتا حالىقتىڭ اقشاسى ازىق-تۇلىكتەن بولەك، دارى-دارمەككە جۇمسالىپ جاتىر. مۇنى پاندەميا كەزىندە تابىستان قاعىلعان ازاماتتار ءۇشىن مەملەكەتتەن كورسەتىلگەن كىشىگىرىم كومەك ەسەبىندە قابىلداۋ قاجەت"، – دەيدى ەڭبەكمين باسشىسى.
2 شىلدە كۇنى قازاقستاندا ەكىنشى رەت كارانتين شەكتەۋلەرى ەنگىزىلەتىنى بەلگىلى بولعاندا، ۆيسە-پرەمەر ەرالى توعجانوۆ “[42500 تەڭگە] توتەنشە جاعداي رەجيمىمەن بايلانىستى بولدى. توتەنشە جاعداي رەجيمى توقتاتىلدى، ەندى ونى تولەۋگە ەشقانداي نەگىز جوق” دەگەن بولاتىن.
باستاپقىدا 5 شىلدەدەن باستاپ ەكى اپتاعا سوزىلاتىن كارانتين 14 شىلدە كۇنى 2 تامىزعا دەيىن ۇزارتىلىپ، تولىق ءبىر ايدى قامتيتىن بولدى.
كارانتيننىڭ ۇزارتىلاتىنىن جاريا ەتكەن پرەمەر-مينيستر اسقار مامين توتەنشە جاعداي جاريالانباسا دا، شەكتەۋگە بايلانىستى قىزمەتى شەكتەلگەن ازاماتتارعا 42 500 تەڭگە كولەمىندەگى ءبىر رەتتىك كومەك بەرىلەتىنىن ايتتى.
