"Kazgiprovodhoz" institýtynyń direktory Ramazan Faizýldin qazirgi sý tasqyny apatyna ne sebep bolǵanyn aitty, - dep habarlaidy Dalanews.kz.
Onyń sózinshe, Qazaqstanda bilikke kelgen sheneýnikti ornynan óte tez aýystyrady. Osylaisha laýazymdy adamdar bul qyzmettiń qyr-syryn zerttep úlgermeidi. Sonymen qatar, ol sý jáne irrigatsiia ministri Nurjan Nurjigitovtiń jumysyna qatysty pikir bildirdi.
"Bul kisini 1 qyrkúiekte taǵaiyndady. Qazaqstannyń jeri kóp. Sý sharýashylyǵy basseinderi bolady. Bul - sharýashylyq. Basqa ministrler siiaqty qur otyrýǵa bolmaidy. Aiaqqa etikti kiip alyp, nysandardy aralap, kózimen kórýi kerek. Sodan keiin bul kisiler endi tájiribe alǵan kezde basqa bir sebeptermen oryndarynan alyp tastaidy. Sodan jańa adamdy qaitadan sailaidy. Ol adam qaitadan osynyń bárimen endi tanysyp bitkenshe, másele sonda", - deidi sarapshy "Ýaqyt kórsetedi" arnasyna suhbatynda.
Faizýldin Nazarbaevtyń 30 jyldyq júiesi sý tasqynynyń qaýpimen nege kúrespegenin, nege bul máseleni oilamaǵanyn aitty.
"Meniń jeke pikirim mynada: 40 paiyzy ádeii jasaǵan ba, 60 paiyzy bilimniń joqtyǵynan (jasaǵan ba - esk.) dep oilaimyn. Óńirler bolady, ákimshilikter bolady, onyń ishinde mamandar bolady. Bizde memlekettik satyp alý degen bolady. Sol tenderdiń ózinde talai bylyqtar bolady. Qarajat durys jumsalmaidy. ...Tender oinalyp jatqan kezde árkim sol tenderdi alǵysy keledi. Sol kezde ádeii isteidi. Ár jobany saralaimyn. Mysaly, gidrotehnikalyq qurylys bolsa, ol tenderdi turǵyn úi salatyndai jariialaidy. Túbi - aila-tásilderdiń arqasynda utyp alý. Al 60 paiyzy zańdylyqty bilmegennen jasaidy", - dedi ol "Ýaqyt kórsetedi" arnasyna suhbatynda.
Aita keteiik, buǵan deiin Májilis depýtaty Ermurat Bapi sońǵy kúnderi sý tasqynyna bailanysty áleýmettik jelilerde negizi joq jelsóz jeldei esip júrgenin málimdegen edi. Onyń sózinshe, tabiǵi apatty paidalanyp, dabylǵa qiqý qosyp ketkender de bar. Muny depýtat "jaý jaǵadan alǵanda, bóri etekten tartadynyń" kerin keltirip júr dep atady.
"Iá, oryn alǵan apatty jaǵdaidyń ýshyǵyp ketýine sebep bolǵan jergilikti biliktiń qamsyzdyǵy men dármensizdigine qatysty syn aitylýy kerek. Biraq syn – shyn bolýy tiis jáne ol syn bilik pen qoǵamdaǵy qatelikterdi túzeýge sep bolǵany jón. Ol syn qoǵamǵa lań salyp, iritki týdyrmaýy tiis.
Degenmen kóziqaraqty adamǵa bul aqparattyq órttiń bir pushpaǵyn "Eski Qazaqstannyń" ókilderi úrlep júrgeni baiqalady. Olardyń maqsaty aiqyn – eldegi ereýil jaǵdaidy eselep, óshpendilikti órshitý jáne sol arqyly qoǵamda turaqsyzdyq týdyrý", - dedi ol.
Bapidiń aitýynsha, olar nátijesinde "memlekettik organdar orasholaq, bilik berekesiz" degen qoǵamdyq pikir týdyryp, qazirgi memleket basshysynyń bedelin túsirip, halyqty jik-jikke bólýdi kózdese, ekinshi jaǵynan, 30 jylǵy áreketsizdikteri men jemqorlyǵy saldarynan ábden qordalanyp, búginde bolyp otyrǵan tabiǵi apattan ózderin arashalap alǵysy keledi.
