40 پايىزى ادەيى جاسايدى، 60 پايىزى ءبىلىم جوقتىعىنان - ساراپشى سۋ تاسقىنى تۋرالى

ساعىنىش سارداروۆا 23 ءساۋ. 2024 11:24 2833

"كازگيپروۆودحوز" ينستيتۋتىنىڭ ديرەكتورى رامازان فايزۋلدين قازىرگى سۋ تاسقىنى اپاتىنا نە سەبەپ بولعانىن ايتتى، - دەپ حابارلايدى Dalanews.kz.

ونىڭ سوزىنشە، قازاقستاندا بيلىككە كەلگەن شەنەۋنىكتى ورنىنان وتە تەز اۋىستىرادى. وسىلايشا لاۋازىمدى ادامدار بۇل قىزمەتتىڭ قىر-سىرىن زەرتتەپ ۇلگەرمەيدى. سونىمەن قاتار، ول سۋ جانە يرريگاسيا ءمينيسترى نۇرجان نۇرجىگىتوۆتىڭ جۇمىسىنا قاتىستى پىكىر ءبىلدىردى.

"بۇل كىسىنى 1 قىركۇيەكتە تاعايىندادى. قازاقستاننىڭ جەرى كوپ. سۋ شارۋاشىلىعى باسسەيندەرى بولادى. بۇل - شارۋاشىلىق. باسقا مينيسترلەر سياقتى قۇر وتىرۋعا بولمايدى. اياققا ەتىكتى كيىپ الىپ، نىسانداردى ارالاپ، كوزىمەن كورۋى كەرەك. سودان كەيىن بۇل كىسىلەر ەندى تاجىريبە العان كەزدە باسقا ءبىر سەبەپتەرمەن ورىندارىنان الىپ تاستايدى. سودان جاڭا ادامدى قايتادان سايلايدى. ول ادام قايتادان وسىنىڭ بارىمەن ەندى تانىسىپ بىتكەنشە، ماسەلە سوندا"، - دەيدى ساراپشى "ۋاقىت كورسەتەدى" ارناسىنا سۇحباتىندا.

فايزۋلدين نازاربايەۆتىڭ 30 جىلدىق جۇيەسى سۋ تاسقىنىنىڭ قاۋپىمەن نەگە كۇرەسپەگەنىن، نەگە بۇل ماسەلەنى ويلاماعانىن ايتتى.

"مەنىڭ جەكە پىكىرىم مىنادا: 40 پايىزى ادەيى جاساعان با، 60 پايىزى ءبىلىمنىڭ جوقتىعىنان (جاساعان با - ەسك.) دەپ ويلايمىن. وڭىرلەر بولادى، اكىمشىلىكتەر بولادى، ونىڭ ىشىندە ماماندار بولادى. بىزدە مەملەكەتتىك ساتىپ الۋ دەگەن بولادى. سول تەندەردىڭ وزىندە تالاي بىلىقتار بولادى. قاراجات دۇرىس جۇمسالمايدى. ...تەندەر وينالىپ جاتقان كەزدە اركىم سول تەندەردى العىسى كەلەدى. سول كەزدە ادەيى ىستەيدى. ءار جوبانى سارالايمىن. مىسالى، گيدروتەحنيكالىق قۇرىلىس بولسا، ول تەندەردى تۇرعىن ءۇي سالاتىنداي جاريالايدى. ءتۇبى - ايلا-تاسىلدەردىڭ ارقاسىندا ۇتىپ الۋ. ال 60 پايىزى زاڭدىلىقتى بىلمەگەننەن جاسايدى"، - دەدى ول "ۋاقىت كورسەتەدى" ارناسىنا سۇحباتىندا.

ايتا كەتەيىك، بۇعان دەيىن ءماجىلىس دەپۋتاتى ەرمۇرات باپي سوڭعى كۇندەرى سۋ تاسقىنىنا بايلانىستى الەۋمەتتىك جەلىلەردە نەگىزى جوق جەلسوز جەلدەي ەسىپ جۇرگەنىن مالىمدەگەن ەدى. ونىڭ سوزىنشە، تابيعي اپاتتى پايدالانىپ، دابىلعا قيقۋ قوسىپ كەتكەندەر دە بار. مۇنى دەپۋتات "جاۋ جاعادان العاندا، ءبورى ەتەكتەن تارتادىنىڭ" كەرىن كەلتىرىپ ءجۇر دەپ اتادى.

"ءيا، ورىن العان اپاتتى جاعدايدىڭ ۋشىعىپ كەتۋىنە سەبەپ بولعان جەرگىلىكتى بيلىكتىڭ قامسىزدىعى مەن دارمەنسىزدىگىنە قاتىستى سىن ايتىلۋى كەرەك. ءبىراق سىن – شىن بولۋى ءتيىس جانە ول سىن بيلىك پەن قوعامداعى قاتەلىكتەردى تۇزەۋگە سەپ بولعانى ءجون. ول سىن قوعامعا لاڭ سالىپ، ىرىتكى تۋدىرماۋى ءتيىس.

دەگەنمەن كوزىقاراقتى ادامعا بۇل اقپاراتتىق ءورتتىڭ ءبىر پۇشپاعىن "ەسكى قازاقستاننىڭ" وكىلدەرى ۇرلەپ جۇرگەنى بايقالادى. ولاردىڭ ماقساتى ايقىن – ەلدەگى ەرەۋىل جاعدايدى ەسەلەپ، وشپەندىلىكتى ءورشىتۋ جانە سول ارقىلى قوعامدا تۇراقسىزدىق تۋدىرۋ"، - دەدى ول.

ءباپيدىڭ ايتۋىنشا، ولار ناتيجەسىندە "مەملەكەتتىك ورگاندار وراشولاق، بيلىك بەرەكەسىز" دەگەن قوعامدىق پىكىر تۋدىرىپ، قازىرگى مەملەكەت باسشىسىنىڭ بەدەلىن ءتۇسىرىپ، حالىقتى جىك-جىككە ءبولۋدى كوزدەسە، ەكىنشى جاعىنان، 30 جىلعى ارەكەتسىزدىكتەرى مەن جەمقورلىعى سالدارىنان ابدەن قوردالانىپ، بۇگىندە بولىپ وتىرعان تابيعي اپاتتان وزدەرىن اراشالاپ العىسى كەلەدى.


ۇسىنىلعان
سوڭعى جاڭالىقتار