Jalal-Abad oblysynyń Aqsy aýdanynda 25 jastaǵy Aichúrók Ómúralievanyń ólimine qatysty tergeý júrgizilip jatyr. Marqumnyń týystary áiel turmystyq zorlyq-zombylyqtyń qurbany bolýy múmkin ekenin aitsa, politsiia sot-meditsinalyq saraptama taǵaiyndalǵanyn málimdedi, dep habarlaidy dalanews.kz.
Jaqyndarynyń aitýynsha, Aichúrókten úsh bala – eki ul men bir qyz qalǵan. Olar áieldiń qaitys bolar aldynda otbasyndaǵy jaǵdaiǵa shaǵymdanyp, basqa jaqqa ketýge kómektesýdi suraǵanyn aitady.
Marqumnyń aǵasy Aqylbek Ómúralievtiń sózinshe, qaiǵyly oqiǵa bolǵan kúni qaryndasy týystary men synyptastaryna habarlama jibergen.
"Onyń SMS-habarlamalary bar. Sol kúni týystaryna qońyraý shalyp: "Bishkekke ketemin, maǵan baspana jáne turatyn jer taýyp berińder", – degen. Al synyptastaryna: "Meni uryp jatqan siiaqty, óltirip jiberýi múmkin", – dep jazǵan", – dedi ol.
Týystary áieldiń denesinen kúsh qoldanylǵanyn kórsetýi múmkin izder baiqalǵanyn málimdedi.
"Denesiniń oń jaǵynda soqqydan qalǵanǵa uqsaityn qyzyl izder boldy. Moinynda saýsaq izderi kórindi. Moinynyń sol jaǵynan jelkesine deiin qara-kók gematomalar bolǵan", – deidi marqumnyń aǵasy.
Ol tergeý barysyna da narazylyq bildirdi.
"Nelikten qyzdyń denesinde jaraqat joq, denesi taza dep aityp jatyr? Mundai qorytyndy qandai negizde jasaldy?" – dedi Ómúraliev.
Al marqumnyń kúieýiniń týystary turmystyq zorlyq-zombylyq týraly nusqany joqqa shyǵaryp otyr. Olardyń aitýynsha, Aichúróktiń ólimi qatygezdikpen bailanysty emes.
"Bul zorlyq-zombylyq bolǵan joq. Eger saraptama kerisinshe qorytyndy jasasa, biz ony qabyldaimyz. Bizge adam qaitys bolǵannan keiin bir jarym-úsh saǵattan soń denesinde gematomalar paida bolýy múmkin ekenin túsindirdi. Bul sondai jaǵdai bolýy yqtimal", – dedi olar.
Jalal-Abad oblystyq ishki ister basqarmasy áieldiń ólimine qatysty tergeý júrip jatqanyn habarlady.
"Oqiǵanyń barlyq mán-jaiyn anyqtaý úshin sot-meditsinalyq saraptama taǵaiyndaldy. Saraptama qorytyndysy boiynsha bolǵan jaǵdaiǵa zańnamaǵa sáikes quqyqtyq baǵa beriledi", – dedi oblystyq politsiia ókili.
Tergeý jalǵasyp jatyr.
