Qazaqstanǵa aldaǵy jyldary 144 ushaq jetkiziledi. Bul týraly Senattaǵy parlamenttik tyńdaýda kólik ministri Nurlan Saýranbaev málimdedi, dep habarlaidy Dalanews.kz.
Ministrdiń aitýynsha, vedomstvo Halyqaralyq azamattyq aviatsiia uiymymen (ICAO) birlesip, 2050 jylǵa deiingi master jospar ázirlep jatyr. Qujatty jyl sońyna deiin qabyldaý kózdelgen.
Nurlan Saýranbaev tranzittik reister sany turaqty ósip kele jatqanyn atap ótti. Keiingi bes jylda bul kórsetkish tórt ese artqan.
2025 jyly áýe qozǵalysyn basqarý júiesin jańǵyrtý úshin amerikalyq Leidos kompaniiasymen kelisimshart jasalǵan. Aldaǵy bes jylda aeronavigatsiia infraqurylymy tolyq jańartylyp, bul Qazaqstannyń áýe dálizderiniń tiimdiligin arttyrýǵa múmkindik beredi.
Ministr álemdik aviatsiia salasyndaǵy basty máselelerdiń biri ushaq tapshylyǵy ekenin aitty. Jańa áýe kemelerin alý úshin uzaq kútýge týra keledi. Mysaly, búgin Boeing kompaniiasymen kelisimshart jasalsa, ushaqty jetkizý 8-10 jylǵa sozylýy múmkin.
Soǵan qaramastan, qazaqstandyq áýe tasymaldaýshylar óndirýshilermen tikelei jumys júrgizip jatyr. Jyl sońyna deiin áýe parki taǵy 6 ushaqpen tolyqpaq. Al 2040 jylǵa deiin jalpy sany 144 áýe kemesin jetkizý josparlanǵan.
