2027 jyldyń ortasynan bastap Qazaqstan bankteriniń qaryz alýshylardy baǵalaý tártibine jańa talaptar engiziledi. Endi qarjy uiymdary keibir klientterdiń qarjylyq jaǵdaiymen qatar, olardyń qyzmetine bailanysty ekologiialyq jáne áleýmettik táýekelderdi de saralaýǵa tiis, dep habarlaidy dalanews.kz.
Protenge málimetinshe, jańa talaptar negizinen orta bizneske beriletin nesielerge, korporativtik jáne jobalyq qarjylandyrýǵa qatysty bolady. Iaǵni osy sanattaǵy qaryz alýshylar úshin qarjylandyrý týraly sheshim qabyldaý kezinde ekologiialyq jáne áleýmettik faktorlar da bank nazaryndaǵy kórsetkishterdiń birine ainalady.
Sonymen birge ekinshi deńgeili bankter turaqty damý baǵyty boiynsha arnaiy bólim qurýǵa nemese osy salaǵa jaýapty mamandardy jumysqa tartýǵa mindetteledi. Olar ESG qaǵidattaryn engizý, ishki qujattardy ázirleý, qyzmetkerlerdi oqytý jáne tiisti eseptilikti daiyndaý jumystaryn úilestiredi.
Astana Finance Days 2026 aiasynda Eýraziialyq bank basqarmasynyń tóraǵasy Lázzat Satieva turaqty damý salasyndaǵy aqparatty ashýǵa qoiylatyn talaptar aitarlyqtai keńeietinin aitty.
"Shynynda da, kelesi jyldan bastap turaqty damý salasyndaǵy aqparatty ashýǵa qoiylatyn talaptar aitarlyqtai keńeiedi. Onyń ishinde banktiń óz qyzmetinen jáne qarjylandyratyn jobalardan bólinetin parniktik gazdar kólemin baǵalaý da bar. Biz bul baǵytta qazirdiń ózinde jumys istep jatyrmyz: bank eki jyldan beri turaqty damý jónindegi esepti jariialap keledi, ESG máselelerin basqarýdyń bazalyq júiesi qalyptastyryldy. Endi jekelegen baǵyttardy tereńirek pysyqtaý qajet bolady. Jyl boiy osy jumystarmen ainalysamyz. Árine, bul bank tarapynan qosymsha shyǵyndardy talap etedi", – dedi ol.
Satieva aldaǵy ózgeristerge qansha qarajat jumsalatynyn naqtylaǵan joq. Onyń sózinshe, negizgi shyǵyndar ádistemelik bazany ázirleýge, aqparat jinaý men taldaýǵa, keńes berý qyzmetterine jáne ekologterdi qosa alǵanda, beiindi mamandardy jumysqa tartýǵa bailanysty bolady.
Degenmen bankte jańa talaptarǵa jumsalatyn shyǵyndar nesie qunynyń ósýine tikelei áser etedi dep eseptemeidi.
"Biz bul shyǵyndardy nesie qunynyń ósýine ózdiginen áser etetin faktor retinde qarastyrmaimyz. Nesie mólsherlemesi kóptegen faktordy eskere otyryp qalyptasady. Sondyqtan banktiń ESG tájiribesin engizýge jumsaityn shyǵyny nesie qunyna tikelei áser etedi dep aitý durys bolmas edi", – dedi Satieva.
2027 jyldan bastap naqty ne ózgeredi?
Qazaqstanda qarjy uiymdaryna ESG eseptiligine qatysty talaptar kezeń-kezeńimen engizilip jatyr. 2027 jyldyń ortasynan bastap bankter turaqty damý jónindegi arnaiy bólim qurýǵa nemese osy baǵytqa jaýapty qyzmetkerlerdi jumysqa alýǵa mindetteledi.
Bul mamandar ESG qaǵidattaryn engizýmen, banktiń ishki qujattaryn ázirleýmen, qyzmetkerlerdi oqytýmen jáne ESG eseptiligin daiyndaý jumystaryn úilestirýmen ainalysady.
Budan bólek, ekinshi deńgeili bankter ekologiialyq jáne áleýmettik táýekelderdi basqarýdyń ESDD júiesin engizýge tiis. Bul júie orta kásiporyndarǵa nesie berý, korporativtik jáne jobalyq qarjylandyrý kezinde qaryz alýshynyń qyzmetine bailanysty ekologiialyq jáne áleýmettik táýekelderdi baǵalaýdy kózdeidi.
Iaǵni atalǵan sanattaǵy kásipkerler men kompaniialarǵa qarjy berý kezinde bankter olardyń tólem qabileti men qarjylyq jaǵdaiyna ǵana emes, qyzmetiniń qorshaǵan ortaǵa jáne áleýmettik salaǵa yqtimal áserine de nazar aýdarady.
Al ESG strategiiasynyń júzege asyrylýy men ESDD júiesiniń jumysyna banktiń direktorlar keńesi baqylaý jasaidy.
