2024 jyldyń III toqsanynda ekinshi deńgeili bankter men banktik emes jekelegen aiyrbastaý pýnkterinde jalpy salmaǵy 475,5 keliniń 13 940 altyn quimasy satyldy, dep habarlaidy Dalanews.kz QR Ulttyq banktiń baspasóz qyzmetine silteme jasap.
Halyqqa tazartylǵan altyn quimalardy satý jáne satyp alý baǵdarlamasyn (budan ári – Baǵdarlama) Ulttyq Bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 7,4 tonna 199 235 altyn quima satyldy.
Altyn quimalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ie túri – 10 gramdyq altyn quima. Jalpy satylǵan quimalar arasynda onyń úlesi 24% – 48 629 dana. Odan keiin 100 gramdyq altyn quima – 47 227 dana (24%), 5 gramdyq quima – 44 127 dana (22%), 20 gramdyq quima – 31 612 dana (16%), jáne 50 grammdyq quima – 27 640 dana (14%).
2024 jylǵy III toqsanda altyn quimalardyń eń kóp bóligi myna óńirlerde satyldy: Almatyda (8 101 dana, 58%), Shymkentte (1 279 dana, 9%) jáne Astanada (1 243 dana, 9%).
"Altyn quimalar senimdi investitsiia quraly bola alady. Altyn quimalar naryǵyndaǵy ótimdiliktiń basty kepili – bank pen banktik emes aiyrbastaý pýnkteri klientke aqshany sol kúni tólei otyryp, altyn quimalardy keri satyp ala alady. Baǵdarlama júzege asqaly ekinshi deńgeili bankter men banktik emes jekelegen pýnkter jalpy salmaǵy 1,1 tonna 41 058 altyn quimany keri satyp alǵan. Bul – jalpy satylǵan altyn quimalardyń 21%-y. Olar keri satyp alýǵa qabyldaǵan ólshemeli quimalardyń barlyǵy halyqqa Ulttyq banktiń filialdaryna keri tapsyrýsyz satylady", delingen Ulttyq bank habarlamasynda.
Árbir quima qorǵaý elementterimen qaptalǵan (quimanyń aina beti, mikrotekst jáne bederli jiegi bar) jáne mehanikalyq zaqymdanýdan qorǵaityn arnaiy qorapqa salynyp shyǵady. Sol arqyly quimanyń ashylǵan-ashylmaǵanyn ońai tekserýge bolady. Qorǵap turatyn qorap sondai-aq sapa sertifikaty bolyp sanalady. Sondyqtan, altyn quimany uqypty saqtap, qorabyn búldirmeýge keńes beremiz.
Qazir altyn quimalardy birqatar ekinshi deńgeili bankterde, sondai-aq banktik emes jekelegen pýnkterden satyp alyp, keri satýǵa bolady.
