Qazaqstandyqtardyń bir bóligi buryn tólegen jeke tabys salyǵynyń (JTS) bir bóligin qaitaryp ala alady. Alaida kópshilik mundai múmkindik bar ekenin de bilmeidi, dep habarlaidy dalanews.kz.
Qazaq Expert Club sarapshysy, salyq keńesshisi Raýshan Tasshoinovanyń aitýynsha, 2025 jylǵa arnalǵan 270.00 nysanyndaǵy deklaratsiiany jeke tulǵalar 15 qyrkúiekke deiin tapsyrýy tiis. Keibir azamattar úshin bul 2025 jyly artyq tólengen jeke tabys salyǵyn qaitaryp alýdyń sońǵy múmkindigi bolmaq.
Qandai jaǵdaida salyqty artyq tólep qoiýyńyz múmkin?
Sarapshynyń aitýynsha, qazaqstandyqtar kóbine ózderine tiesili salyqtyq shegerimderdi paidalanbaǵandyqtan qarjydan qaǵylady.
2025 jyly azamattar salyq salynatyn tabysyn:
oqý aqysyna jumsalǵan shyǵyndar;
meditsinalyq qyzmetterge ketken shyǵyndar;
ipotekalyq turǵyn úi nesiesi boiynsha syiaqy tólemderi esebinen azaita alǵan.
Eger bul shegerimder jumys berýshi arqyly rásimdelmese, azamat deklaratsiia tapsyrý kezinde olardy óz betinshe kórsete alady.
Alaida árbir shegerim túrine qatysty ózindik talaptar men shekteýler bolǵan.
Mysaly, bilim berý boiynsha shegerim mektepke deiingi, tehnikalyq jáne kásiptik, orta bilimnen keiingi jáne joǵary bilim alýǵa jumsalǵan shyǵyndarǵa ǵana qoldanyldy. Meditsinalyq shegerim kosmetologiialyq qyzmetterge júrmeidi. Al ipoteka boiynsha tek turǵyn úi zaemynyń syiaqysyna tólengen qarajat qana esepke alynady.
Artyq tólengen salyqty qalai qaitarýǵa bolady?
Ol úshin azamat:
270.00 nysanyndaǵy deklaratsiiany tapsyrýy;
shyǵyndardy rastaityn qujattardy qosa usynýy qajet.
Eger qaita esepteý nátijesinde jeke tabys salyǵy artyq ustalǵany anyqtalsa, salyq tóleýshi artyq tólengen somany qaitarýǵa quqyly.
Sonymen qatar, 2025 jyly jumys berýshi arqyly aldyn ala ózge de salyqtyq shegerimderdi qoldanǵan azamattar deklaratsiiany rastaityn qujattarymen birge mindetti túrde tapsyrýy kerek. Bul – salyq zańnamasynyń talaby.
Múlik pen kólik salyǵyn da teksergen jón
Raýshan Tasshoinova artyq tólemniń taǵy bir jii kezdesetin sebebi múlik pen kólik salyǵyn esepteýdegi qatelikter ekenin aitady.
Bul salyqtar memlekettik aqparattyq júielerdegi málimetter negizinde avtomatty túrde esepteledi. Eger aqparat kesh jańartylsa nemese qate bolsa, salyq ta durys eseptelmeýi múmkin.
Máselen, kólik burynǵy iesiniń atynan shyǵarylǵanymen, jańa menshik iesi týraly aqparat júiege áli túspese, salyq burynǵy iesine eseptelýi yqtimal. Osyndai jaǵdailar jyljymaityn múlikke qatysty da kezdesedi.
Kimder salyq jeńildikterine ie?
Kópshilik múlik salyǵy boiynsha jeńildikter qarastyrylǵanyn da bile bermeidi.
Mundai jeńildikter:
ardagerlerge;
múgedektigi bar adamdarǵa;
jetim balalarǵa;
múgedektigi bar balany tárbielep otyrǵan ata-ananyń birine;
«Altyn alqa» alqasymen marapattalǵan kópbalaly analarǵa;
bólek turatyn zeinetkerlerge beriledi.
Depozit paiyzyna salyq salyna ma?
Sarapshynyń aitýynsha, halyq arasynda banktegi depozitten túsken syiaqyǵa jeke tabys salyǵy salynady degen qate túsinik bar.
Shyn máninde, Qazaqstan bankterindegi depozitter boiynsha alynǵan syiaqy jeke tabys salyǵynan bosatylǵan. Biraq bul jeńildik tek elimizdegi bankterde ashylǵan depozitterge ǵana qatysty. Al sheteldik bankterdegi depozitterden túsken tabysqa mundai jeńildik qoldanylmaidy.
2026 jyldan bastap ereje ózgerdi
Raýshan Tasshoinova deklaratsiia tapsyrmas buryn:
barlyq salyqtyq shegerimderdiń paidalanylǵanyn;
múlik pen kólik salyǵynyń durys eseptelgenin;
salyqtyq jeńildik alýǵa quqyǵyńyzdyń bar-joǵyn tekserýge keńes beredi.
Sonymen birge sarapshy bul tártiptiń tek 2025 jylǵy tabystarǵa qatysty ekenin eske saldy.
2026 jyldyń 1 qańtarynan bastap oqý, meditsinalyq qyzmet, ipotekalyq turǵyn úi zaemy boiynsha syiaqy jáne birqatar ózge de salyqtyq shegerimder kúshin joidy. Olardyń ornyna 30 AEK mólsherindegi biryńǵai bazalyq shegerim engizildi.
