2020 jylǵa qarai Nazarbaev Ýniversitet stýdentteriniń 20% sheteldikter bolady
«Bir beldeý – bir joldyń» negizi bilim, joramaldardy tekserý jáne bizdi biriktiretin ortaq dúnielerdi tabý. Biznes salasynda, intellektýaldy jáne zertteý salasynda múmkindikter ashylýda», – degen Loretta O'Donnelldiń sózin keltiredi «South China Morning Post» (SCMP) basylymy «Qazaqstandyq ýniversitet «Bir beldeý – bir jol» aiasynda gonkongtik stýdentterge stipendiialar usynýy múmkin» degen maqalasynda. O'Donnelldiń aitýynsha, Gonkong qazaqstandyq stýdentterge stipendiialyq baǵdarlamalar usynady, sol sebepti Nazarbaev Ýniversitet te gonkongtik stýdentterge qatysty osyndai qadam jasaýǵa nietti. Biraq, jospardyń jai-japsary áli naqtylanǵan joq. «O'Donnell ýniversitettegi 4 myń stýdenttiń 14-i ǵana sheteldik ekenin aitty. 2020 jylǵa qarai ýniversitet halyqaralyq stýdentter sanyn JOO stýdentteriniń 20% deiin jetkizýdi josparlap otyr», – dep atap ótti SCMP.
Basylymnyń habarlaýynsha, Nazarbaev Ýniversitettiń akdemiialyq ister boiynsha vitse-provosty Gonkongty qazaqstandyq stýdentterdi tartý arqyly paida tabýǵa shaqyrdy. «Bizde adami kapital bar degen oidamyz jáne Gonkong úkimeti de muny jaqsy biledi», – dedi O'Donnell. SCMP 2016 jyldyń maýsym aiynda Gonkong Bilim berý biýrosynyń «Bir beldeý – bir jol» aýqymyndaǵy elderden kelgen 100 stýdentke bilim grantyn bólý úshin 1 milliard gonkong dollary bar qor qurý týraly jospar qurǵanyn eske aldy.
