Sharany Qazaqstan Respýblikasy Aqparat jáne qoǵamdyq damý ministrliginiń qoldaýymen Qazaqstandyq qoǵamdyq damý institýtynyń Otbasy institýtyn zertteý ortalyǵy uiymdastyrdy.
El Prezidenti Qasym-Jomart Toqaev Jańa jyl qarsańynda 2022 jyldy «Balalar jyly» dep jariialady.
«Men Memleket basshysy retinde óskeleń urpaqtyń bolashaǵyna basa mán beremin. Jastarǵa zor úmit artamyn. Jastarymyz atqarylyp jatqan aýqymdy jumystyń, reformalardyń igiligin mindetti túrde kóredi. Olardyń arasynda kózi ashyq, kókiregi oiaý, oiy ushqyr azamattar az emes. Biz óskeleń urpaqqa jol ashý úshin barlyq jaǵdaidy jasaýymyz kerek».
Kezdesýdiń maqsaty – Qazaqstanda memlekettik aliment qoryn qurý qajettiligi men múmkindigin talqylaý.
Otyrysqa Qazaqstan Respýblikasy Ádilet ministrliginiń, Qazaqstan Respýblikasy Joǵarǵy Sotynyń, Jeke sot oryndaýshylarynyń respýblikalyq palatasynyń ókilderi, qoǵamdyq birlestikterdiń basshylary, saiasattanýshylar, QQDI sarapshylary qatysty.
Is-shara QR Aqparat jáne qoǵamdyq damý ministrliginiń Jastar jáne otbasy isteri komiteti tóraǵasynyń orynbasary Lira Raisovanyń moderatorlyǵymen ótti.
Ol óz sózinde memleket otbasy institýtyn qoldaýǵa úlken kóńil bóletinin aitty, oǵan Memleket basshysynyń qyrkúiek aiyndaǵy Joldaýy dálel ekendigin jáne onda áleýmettik qoldaýdyń jańa sharalaryn jariialanǵanyn atap ótti.
Sonymen qatar sońǵy kezderi qoǵamda elimizdegi alimenttik qatynastarǵa qatysty kóptegen suraqtar týyndap, bul salada reformalardyń múmkindigi men qajettiligi týraly usynystar aityldy.
Osy taqyrypta ary qarai sóz qozǵaǵan Prezidenttiń kadrlyq rezerviniń múshesi, kásipker Sultan Tundyqbaevtyń baiandamasy qundy aqparattarǵa toly boldy.
Baiandamada qyzyqty statistikalyq derekterdi keltirip, qoǵamda bar máselelerdi atap ótti, osy saladaǵy qajetti reformalar týraly óziniń kózqarasyn aitty.
«Búgingi tańda aliment óndirýde ashyqtyq joq, kóbinese balalardyń qolyna túspeitin alimenttiń tólenip jatqandyǵyna tiisti baqylaý júrgizilmeidi. Búginde 200 myńnan astam bala aliment ala almaýda, olarǵa bul aqsha erteń nemese keiin kerek emes, dál búgin qajet», - dedi spiker.
Ol qaitarymdy bolýy tiis memlekettik aliment qoryn qurý ideiasyn qoldap, onyń jumys isteý mehanizmin usyndy.
Qazaqstan Respýblikasy Jeke sot oryndaýshylary Respýblikalyq palatasy tóraǵasynyń orynbasary Ǵalymbek Smaǵulovtyń óz sózinde aliment óndirý tájiribesi men osy saladaǵy qazirgi jaǵdaiǵa toqtaldy. Sondai-aq ol Palata jumysyna jáne oryn alyp otyrǵan máselelerge, alimenttik isterdi oryndaý boiynsha qabyldanǵan jáne josparlanǵan zańnamalyq ózgeristerge toqtalyp, sondai-aq, talqylanyp otyrǵan másele boiynsha JSO palatasynyń ustanymyn atap ótti.
«Búginde alimentterdi óndirip alýdyń nátijeliligi sot oryndaýshylaryna 90% jáne boryshkerge 10% bailanysty. 93 paiyzynda aliment tóleý oryndalsa, 7 paiyzynda máseleler bar. Aliment tólemeý – bul memlekettik áleýmettik másele, sondyqtan ol boiynsha zańnamalyq deńgeide sheshimder qabyldaityn kez keldi»- dedi spiker.
Astana qalasynyń kámeletke tolmaǵandar isteri jónindegi mamandandyrylǵan aýdanaralyq sotynyń tóraǵasy Janargúl Alpysbaeva óz sózinde Memleket ataýly áleýmettik qoldaý salasynda, onyń ishinde halyqtyń áleýmettik osal toptaryn qoldaý baǵytynda kóp jumys atqaratynyn, sondai-aq Memleket basshysynyń qyrkúiek aiyndaǵy Joldaýynda da qoldaýdyń mańyzdy sharalary aitylǵandyǵyna toqtaldy.
«Qazaqstandyq qoǵamdyq damý institýty» KeAQ Otbasy institýtyn zertteý ortalyǵynyń jetekshisi Juldyz Battalova «Memlekettik aliment qoryn qurýdyń halyqaralyq tájiribesi» taqyrybynda baiandama jasady.
Otyrysqa qatysqan spikerler: «Pravo» qoǵamdyq qorynyń tóraǵasy Olga Ryl, Qazaqstan Respýblikasy Jeke sot oryndaýshylary respýblikalyq palatasy tóraǵasynyń keńesshisi Irak Elekeev, QQDI strategiialyq taldaý tobynyń jetekshisi Liazat Nurqatova jáne basqa da sharaǵa qatysýshylar da talqylanyp jatqan másele boiynsha óz pikirlerin bildirip, osy baǵyttaǵy jumystardy jalǵastyrý qajettigin qoldady.
Jiyn sońynda moderator Lira Fazylova qatysýshylarǵa is-sharaǵa belsendi qatysqandary úshin alǵysyn bildirip, mańyzdy máseleni talqylaý jumystary jalǵasatynyn, aitylǵan barlyq usynystar aldaǵy jumysta eskeriletinin atap ótti.
