Qazaqstanda avtomobil óndirisi qarqyndy ósip jatqanymen, salanyń basty máseleleriniń biri – kólikke qajetti bólshekterdiń basym bóligi áli de shetelden jetkiziledi, dep habarlaidy dalanews.kz.
Bul týraly Ónerkásip jáne qurylys ministri Ersaiyn Naǵaspaev Úkimet otyrysynda málimdedi.
Ministrdiń aitýynsha, sońǵy jyldary eldegi avtokólik óndirisi aitarlyqtai artqan. Eger 2010 jyldary jylyna nebári 3 myń kólik shyǵarylsa, ótken jyly bul kórsetkish 171 myńnan asqan. Biyl alǵashqy alty aidyń ózinde 94,4 myń avtomobil óndirilip, ósim 35 paiyzdy qurady.
Alaida óndiris kóleminiń ósýi saladaǵy negizgi máseleni tolyq sheshe alǵan joq.
“Endigi negizgi mindet – daiyn avtokólik shyǵarýmen qatar, onyń quramdas bólikterin óz elimizde óndirýdi damytý. Osy baǵytta lokalizatsiia deńgeiin arttyrý, avtokomponentterdiń otandyq óndirisin jolǵa qoiý jáne qazaqstandyq jetkizýshilerdiń óndiristik ekojúiesin qalyptastyrý jumystary júrgizilýde”, – dedi ministr.
Qazir Qazaqstanda shinalar, akkýmýliatorlar, qozǵaltqysh bólshekteri, avtobýsqa arnalǵan metall bólshekter, oryndyqtar men mýltimediialyq júieler shyǵarylady. Sonymen qatar bamper, elektr symdary, dońǵalaq diskileri jáne lak-boiaý materialdaryn óndiretin jobalar iske asyrylyp jatyr.
Úkimet avtokomponent óndirisin damytý úshin Qostanai, Saran jáne Almaty qalalarynda ónerkásiptik klasterler qalyptastyryp jatyr.
Sonymen qatar Qytaidyń Li Auto, OMODA, JAECOO brendterin shyǵarý, SITRAK pilotsyz júk kólikterin óndirý jáne BYD kompaniiasymen birlesip joǵary jyldamdyqty qýattaý stantsiialaryn salý josparlanyp otyr.
Ministrdiń málimetinshe, búginde elde avtomobil shyǵaratyn 11 kásiporyn jumys isteidi. Sońǵy bes jylda salaǵa 457 mlrd teńgege jýyq investitsiia tartylǵan.
Biyl óndiris kólemin 190 myń kólikke deiin jetkizý josparlanǵan.
Sonymen birge ministr avtomobil óndirisiniń kelesi kezeńi daiyn kólik qurastyrý emes, Qazaqstanda tolyqqandy avtokomponent óndirisin qalyptastyrý bolatynyn atap ótti. Onyń sózinshe, bul importqa táýeldilikti azaityp, otandyq kásiporyndardyń halyqaralyq óndiris tizbegine qosylýyna múmkindik beredi.
