Osh oblysynyń Qara-Sýý aýdandyq soty neke jasyna qatysty zań talaptaryn buzǵan úsh turǵyndy kináli dep tanydy. Olardyń qatarynda 17 jastaǵy qyzdyń anasy, kúieýi jáne dini neke qiiý rásimin ótkizgen molda bar. Bul týraly sot aktisinde aitylǵan, dep habarlaidy dalanews.kz.
Is materialdaryna sáikes, 2025 jyly Kashkar-Kyshtak aýylynda 17 jastaǵy qyz ben 30 jastaǵy er adamnyń arasynda dini neke qiylǵan. Neke rásimin jergilikti molda ótkizgen. Sot qyzdyń anasy bul nekege er adamnyń týystarymen aldyn ala kelisim jasaǵanyn anyqtady.
2026 jyldyń sáýir aiynda qyz júktilik boiynsha meditsinalyq esepke turǵan, al 22 mamyrda ul balany dúniege ákelgen.
Is boiynsha aiyptalýshylar retinde qyzdyń kúieýi, anasy jáne neke qiiý rásimin ótkizgen molda tanyldy. Úsheýi de óz kinálaryn moiyndaǵan.
Sot olardyń kinásin moiyndaǵanyn, buryn sottalmaǵanyn jáne jazany aýyrlatatyn mán-jailardyń joq ekenin eskerdi. Úsheýine de úsh jyl bas bostandyǵynan aiyrý jazasy taǵaiyndaldy. Alaida sot bir jyl merzimge probatsiialyq baqylaý qoldandy.
Osy kezeńde sottalǵandarǵa elden shyǵýǵa tyiym salynady. Sondai-aq olar aiyna eki ret probatsiia organdaryna kelip, resotsializatsiia baǵdarlamalaryna qatysýǵa mindetti.
Qyrǵyzstanda zań boiynsha neke jasy 18 jas bolyp belgilengen. Alaida erekshe jaǵdailarda arnaiy komissiianyń qorytyndysy negizinde ony 17 jasqa deiin tómendetýge bolady.
Equality Now halyqaralyq quqyq qorǵaý uiymynyń málimetinshe, Qyrǵyzstandaǵy 20-24 jas aralyǵyndaǵy qyz-kelinshekterdiń shamamen 13 paiyzy 18 jasqa tolmai turmysqa shyqqan.
