15 sáýirden bastap Qazaqstan bankteri mobildi aýdarymdar týraly málimetterdi salyq organdaryna joldai bastaidy. Jańa talap aiasynda qarjy uiymdary 2026 jyldyń birinshi toqsany boiynsha barlyq mobildi aýdarym jónindegi aqparatty usynýǵa mindetteledi. Bul týraly Qarjy vitse-ministri Erjan Birjanov málimdedi, dep habarlaidy Dalanews.kz.
Ministrlik málimetterdi alǵannan keiin kameraldyq baqylaý júrgizip, kúmán týdyrǵan jaǵdailar boiynsha azamattarǵa habarlama jiberedi. Eger azamat belgilengen merzimde túsinikteme berse nemese qajetti salyq esebin tapsyrsa, másele jabylǵan bolyp esepteledi.
Vedomstvo ókilderiniń aitýynsha, jeke maqsattaǵy aqsha aýdarymdary kásipkerlik tabys retinde qarastyrylmaidy. Iaǵni týǵan kún, toi-tomalaq nemese basqa da otbasylyq sharalar kezinde jaqyndarynan túsken qarajat salyqtyq tekserýge negiz bolmaidy.
Baqylaýdyń negizgi maqsaty – taýar men qyzmet aqysyn jeke bank kartasyna qabyldap, tabysyn resmi kórsetpeitin kásipkerlerdi anyqtaý. Salyq organdary bul rette aýdarym kóleminen buryn aqsha jiberýshiler sanyna nazar aýdarady. Eger bir ai ishinde shotqa 100-den astam ártúrli adamnan aqsha túsip, bul jaǵdai úsh ai qatarynan qaitalansa jáne jalpy soma 1 million 20 myń teńgeden assa, mundai operatsiialar tekserýge iligýi múmkin.
Bir adam kúnine birneshe ret aqsha aýdarǵan kúnniń ózinde ol bir ǵana jiberýshi retinde esepteledi. Sonymen qatar jeke kásipker retinde tirkelgen azamattardyń jeke shottary da qajet bolǵan jaǵdaida tekserilýi múmkin.
Eskertýge jaýap bermegen jaǵdaida azamattarǵa aiyppul salynýy yqtimal. Onyń kólemi tólenbegen salyqtyń 200 paiyzyna deiin jetýi múmkin. Al habarlama alǵan azamattarǵa jaýap berý úshin 30 jumys kúni beriledi. Osy ýaqyt ishinde olar aýdarymdardyń jeke maqsatta bolǵanyn dáleldeýi nemese tiisti salyqtaryn tólep, qyzmetin zańdastyrýy qajet.
Eger talap oryndalmasa, bank shottaryna shekteý qoiylýy múmkin.
