Qazaqstan men Qytai "Qorǵas" ortalyǵyndaǵy qaýipsizdikti qamtamasyz etý týraly kelisimge qol qoidy. Qujat boiynsha kelissózder 14 jylǵa sozylǵan, dep habarlaidy dalanews.kz.
Bul týraly Ishki ister ministrliginiń resmi ókili Shyńǵys Álekeshev aitty. Onyń sózinshe, kelisim eki el arasyndaǵy birqatar máseleni uzaq ýaqyt boiy kelisýdi talap etken.
Kelissózder ishki ister ministri Erjan Sádenovtiń Beijińge sapary kezinde aiaqtalyp, qujatqa qol qoiylǵan.
"Bul - mańyzdy qujat. Kelissózder 14 jylǵa sozyldy. Osy ýaqyt ishinde eki memleket arasynda birqatar máseleni kelisý qajet boldy. Nátijesinde ministr Erjan Sádenovtiń sapary barysynda taraptar bul jumysty aiaqtap, úkimetaralyq kelisimge qol qoidy", - dedi Shyńǵys Álekeshev.
Onyń aitýynsha, qujat "Qorǵas" aýmaǵynda eki eldiń quzyrly organdarynyń birlesip jumys isteýine naqty quqyqtyq negiz qalyptastyrady.
"Qorǵas" - eki memlekettiń múddesi men zańnamasy toǵysatyn, kún saiyn kóptegen adam ótetin erekshe shekara mańy aýmaǵy. Sondyqtan qaýipsizdikke qatysty másele týyndaǵan jaǵdaida qai tarap jáne qandai tártippen áreket etetini mańyzdy.
Kelisim Qazaqstan men Qytaidyń quzyrly organdary arasyndaǵy ózara is-qimyl tártibin bekitedi. Bul jedel aqparat almasýǵa, quqyqbuzýshylyqtardyń aldyn alýǵa jáne túrli jaǵdailarǵa der kezinde áreket etýge múmkindik beredi.
