Mańǵystaý oblysynda áskeri oqý-jattyǵý kezinde sarbazdar qaza tapqan kúni óńirde jeldiń kúsheietini aldyn ala boljanǵan. Bul týraly Qazgidromet ókilderi málimdedi, dep habarlaidy dalanews.kz.
Mekemeniń málimetinshe, 24 qyrkúiekte Mańǵystaý oblysyndaǵy aýa raiyna atmosferalyq front áser etken. Bir kún buryn jariialanǵan boljamda óńirdiń batysynda, soltústigi men ortalyǵynda ońtústik-shyǵystan soǵatyn jeldiń jyldamdyǵy sekýndyna 15–20 metrge deiin jetetini eskertilgen.
"Qazgidromettiń boljamyna sáikes, 2026 jylǵy 24 qyrkúiekte Mańǵystaý oblysyndaǵy aýa raiy atmosferalyq fronttyń yqpalymen qalyptasty. 23 qyrkúiekte jariialanǵan boljamda kelesi kúni oblystyń batysynda, soltústigi men ortalyǵynda ońtústik-shyǵystan soǵatyn jeldiń jyldamdyǵy sekýndyna 15–20 metrge deiin kúsheietini kórsetilgen. Meteorologiialyq stantsiialardyń baqylaýy boiynsha, is júzinde shyǵys baǵyttaǵy jeldiń jyldamdyǵy sekýndyna 15–16 metrge jetti", – dedi Qazgidromet ókili.
Áleýmettik jelide Aqtaý turǵyndaryna 112 qyzmetinen jiberilgen eskertý habarlamalary da tarady. Onda 24 qyrkúiekte Mańǵystaý oblysynda jeldiń sekýndyna 15–20 metrge deiin kúsheietini, dala órti qaýpi bar ekeni jáne belgilenbegen oryndarda sýǵa túsýge tyiym salynatyny jazylǵan.
Eske salaiyq, Mańǵystaý oblysynda oqý-jattyǵý-jaýyngerlik tapsyrmany oryndaý kezinde aýa raiy kúrt nasharlap, jeldiń kúsheiýinen 17 áskeri qyzmetshi sýǵa ketken. Qorǵanys ministrliginiń naqtylanǵan málimetine sáikes, 12 sarbaz qaza taýyp, úsheýi qutqaryldy. Taǵy eki áskeri qyzmetshini izdestirý jumystary jalǵasyp jatyr.
Osy derekterge bailanysty áskeri oqý-jattyǵýdy ótkizý kezinde aldyn ala jasalǵan aýa raiy boljamy men tótenshe jaǵdai týraly eskertýlerdiń eskerilgen-eskerilmegeni jóninde suraq týyndap otyr. Oqiǵanyń mán-jaiyn úkimettik komissiia anyqtaidy.
